Juohke jagi oidnet olbmot guovžžaid Kárášjogas, sihke lahka márkana ja maiddái dobbelis eret. Birasdirektoráhta loguid mielde ledje diibmá vihtta guovžža Kárášjogas.
Juohke jagi oidnet olbmot guovžžaid Kárášjogas, sihke lahka márkana ja maiddái dobbelis eret. Birasdirektoráhta loguid mielde ledje diibmá vihtta guovžža Kárášjogas.
Stáhta Luonddubearráigeahčču čohkke Birasdirektoráhta ovddas guovžžabaikkaid juohke jagi, mat sáddejuvvojit DNA-iskosiidda. 2015 logut leat dál gárvásat ja dat čájehit ahte diibmá leat čoggon baikkat 49 guovžžas.
– Eanemus guovžžat leat Mátta-Várjjagis, mii lea ge Finnmárkku stuorámus guovžagielda. Doppe leat registrerejuvvon 42 guovžža, muitala Magne Asheim, guhte lea Stáhta Luonddubearráigeahču regionála boraspireovddasvástideaddji Finnmárkkus.
Buot bohtosiid gávnnat Rovbase siiddus.
Vihtta Kárášjogas
Vihtta dan 49 guovžžas leat Kárášjogas leamaš, dain ledje guokte varis guovžža, guokte njiŋŋelas guovžža ja okta man eai dieđe lea go varis vai njiŋŋelas.
– Kárášjohka ja Guovdageaidnu leat dakkár guovllut gos leat eanaš njiŋŋelas guovžžat. Njiŋŋelas guovžžat leat dakkárat mat bissot šaddanbáikki lahka, eai ge vánddar nu guhkás. Nu ahte jus Kárášjogas šaddet njiŋŋelas guovžžat, de maid dávjá bissot doppe. Varis guovžžat ges gal sáhttet guhkes gaskkaid vánddardit, čilge Asheim.
2014:s ledje seamma guovžalogut Kárášjogas.
Jáhkká unnimusat vel ovtta guovžža Kárášjogas
Kárášjogas čogge diibmá 14 baikaiskosa. Dainna ii leat Asheim áibbas duđavaš.
– Kárášjogas galggašedje olbmot viššaleappot čoaggit baikkaid. Doppe lea potensiála gávdnat eanet baikkaid ja jáhkán ainjuo vel ovtta guovžža leat dien guovllus, čilge Asheim.
Asheim dattetge lohká ahte dál ii leat vuos nu dehálaš čoaggigoahtit baikkaid.
– Čoaggigoahtit ii dárbbaš ovdal go sarridat láddet. Guovžžabaikkaid lea álkit dovdat, dat leat stuorrát eaige sulastahte ovdamearkka dihte ealggabaikkaid. Baikkas it dárbbaš váldit eará go bealggemađe, lohká Asheim.
Govven: Tore Solstad/SNO
Dehálaš čohkket baikkaid
Magne Asheim lohká leat dehálažžan ahte olbmot čogget guovžžabaikkaid ja sáddejit sidjiide.
– Baikkaid vuođul oaidnit galle guovžža Finnmárkkus leat, ja daid vuođul mearridit fas eiseválddit guovžaeriid. Nu besset eiseválddit mearridit galget go dáppe eambbo vai unnit guovžžat go dál leat. Finnmárkkus jáhkán sáhttit gávdnat eanet guovžžaid mat eai leat ovdalaččas registrerejuvvon, čilge Asheim.
Son muitala guovžanáli bisson oalle dássedin Finnmárkkus maŋimuš jagiid, birrasii 50 guovžža leat fylkkas leamaš maŋimuš jagiid.
Loga maid: Dákkár baikkain soaittát dinesti 2000 ruvnno
Dollet čoahkkima
Borgemánus doallá Stáhta Luonddubearráigeahčču rabas čoahkkima Kárášjogas, gos juhket dieđuid iskosiid bohtosiid birra. Čoahkkimis muitalit maid eará dieđuid guovžžaid birra.
– Dassážii ráhkadat kárttaid ja nu ain, nu ahte lea álki áddet, čilge Asheim.
