Dál lea guovtti olbmos Deanu gielddas duođaštuvvon korona.
Deanu gielddas heahtejoavkkus lea odne leamašan čoahkkin gieldda koronadilálašvuođa birra. Gielda lea oažžugoahtán bohtosiid iskosiin mat leat váldon vuosttaš njoammuma rájes. Juovlamánu 30. beaivi dieđihii Deanu gielda ahte ovtta gieldda ássis lea duođaštuvvon covid-19. 31.12. Dál lea nuppi olbmos vel duođaštuvvon positiiva covid-19 iskkus.
Goappašagat leaba biddjon ruovttuisolašuvdnii. Son lea leamašan dan vuosttaš olbmo lahkosis geas virus duođaštuvvui dán vahkku ja lea juo erremis. Guoskevaš olbmuin leat geahppa symptomat. Lagasolbmot leat kártejuvvon ja leat biddjon erremii.
Ođđabeairuohta leat 20 olbmos váldán covid-19 iskosa ja daid bohtosiid vurdet oažžut vahkkoloahpa mielde.
Leamašan ipmilbálvalusas
Deanu gielda dieđiha ahte son geas ovddemus duođaštuvvui covid-19 lei juovlaruohta ipmilbálvalusas Sieiddá girkus. Gielda lea váldán oktavuođa buohkaiguin geat ledje dán ipmilbálvalusas. Dat vihtta olbmo geat čohkkájedje lagamusas su geasa koronavirus lea njommon leat biddjon erremii, čállá Deanu gielda.
Juovlamánu 31. beaivvi ledje Deanu gielddas 14 olbmo erremis ja guovttes fas ruovttuisolašuvnnas.
Árvvoštallet ođđasit jus dilli rievdá
Deanu gielddas muitalit ahte máŋggas geain leat mánát skuvla- ja mánáidgárdeagis leat fuolastuvvan ja jerret sáhttet go mánát skuvlii ja mánáidgárdái maŋŋel basiid. Gieldda bealis lohket ahte njoammunguorran dán rádjái ii čujut dan guvlui ahte njoammun lea skuvllas dahje mánáidgárddis dáhpáhuvvan. Gielddadoavttir ii oainne dárbbu doallat mánáid ruovttus, muhto dadjá ahte jus njoammundilálašvuohta rievdá de árvvoštallá dan ođđasit.
