Lappi leana bolesguovlu bivddii cavgilemiid, maŋŋel go muhtin vázzi gávnnai mannan lávvardaga meahccis beatnaga mii lei bahččon ja lei báhccán biidnašuvvat. Beanaeaiggát lea dál gávdnon.
Lappi leana bolesguovlu bivddii cavgilemiid, maŋŋel go muhtin vázzi gávnnai mannan lávvardaga meahccis beatnaga mii lei bahččon ja lei báhccán biidnašuvvat. Beanaeaiggát lea dál gávdnon.
Simo gielddas lei muhtin olmmoš vázzimin tuvrra meahccis Torviatie nammasaš guovllus, go gávnnai mannan duorastat eahkeda beatnaga mii lei báhccán biidnašuvvat.
Belohahkii lámis
Lappi leana bolesguovllu bolesat manne báikái ja oidne beatnaga leat hui heajos vuoimmis ja belohahkii lámis, man dihte boles válljii goddit beatnaga báikái.
– Navdimis lea beanaeaiggát geahččalan jávkadit iežas ruovttuealli báhčimin, muhto ii leat lihkostuvvan ja beana lea báhccán biidnašuvvat. Maŋŋel go beana lea geahččaluvvon jávkaduvvot, lea dat hávdáduvvon sámmáliid vuollái, muhto navdimis lea beana dušše jámálgan ja ealáskan fas maŋŋel. Beana lei rávis unna čáhppes bolfeguolggat, čállá Lappi leana bolesguovlu preassadieđáhusas.
Bivde cavgilemiid
Guovllus gos beana gávdnui, eai leat stobut eaige bolesat lávvardaga diehttán dáhpáhusas maidige ja bivdege cavgilemiid álbmogis, go dutke ášši eallisuodjalanrihkkumin.
Simo lea sullii 26 kilomehtera Kemi gávpogis ja 50 kilomehtera eret Ruoŧa rájás.
Gávdne beanaeaiggáda
Lappi leana bolesguovllus bođii ođđa preassadieđáhus vuossárgga maŋŋel gaskabeaivvi, gos muitalit sin čielggadan ášši ja ahte beanaeaiggát lea gávdnon, maŋŋel go báhčči ieš válddii oktavuođa bolesin.
– Álgodieđuid mielde beanaeaiggát gii orru Meri-Lappis, lei bivdán muhtin oahppása jávkadit iežas boares badjel 10 jahkásaš beatnaga. Almmái guhte galggai jávkadit beatnaga vulggii maŋŋebárgga meahccái ja bážii beatnaga. Maŋŋel go almmái lei báhččán beatnaga, de lei son iskkan ahte beana lei jápmán, ovdal go hávdádii roggái sámmáliid vuollái. Almmái lei báhččán beatnaga eambbo go dušše ovttain luođain, boahtá ovdan preassadieđáhusas.
Eai báikkálaččat
Dán čállá Lappi leana bolesguovlu ja seammás muittuhit ahte lea buoremus diktit šibitdoaktáriid jávkadit ruovttuelliid, go dat ii dagat bákčasiid eaige eallit dárbbaš gillát ja biidnašuvvat.
Beanaeaiggát ja beanabáhčči eaba leat báikkálaččat.
Válddii ieš oktavuođa
Beanabáhčči ieš válddii oktavuođa Kemi bolesin ja lei ieš maid issoras hirpmahuvvan dáhpáhusas.
– Boles čađaha vel iskkadeami ja gažademiid ášši oktavuođas ja loahpaha ášši teknihkkalaš dutkama, man maŋŋel ášši sirdašuvvá áššáskuhtti eiseválddiid árvvoštallamii, čállo preassadieđáhusas.
