FeFo rávve movt láhttet jus vánddardat guovllus gos leat bohccot.
Finnmárkkus lea heajos guohtun ja dat lea dagahan stuora váikkuhusaid bohccuide.
Bohccot leat hearkkes dilis giđđadálvvi ja erenoamážit álddut leat hui hearkkit dáid muttuid.
– Guhkes dálvvi maŋŋel bohccot sáhttet leat heajos vuoimmis ja dárbbašit ráfis guohtut. Áldu sáhttá guođđit miesi jus dat ballá iige miessi de ceavzze. Olbmot geat leat vánddardeamen sáhttet maid baldit bohccuid, dieđiha Finnmárkkuopmodat (FeFo) iežaset neahttasiiddus.
FeFo rávve olbmuid iskat gos biegga boahtá, doallat buori gaskka bohccuide, jorggihit ja vázzit eará guvlui dahje vuordit gitta boazu lea ieš jorggihan jus vánddarda guovllus gos sáhttet bohccot.
FeFo muittuha maid ahte cuoŋománu 1. beaivvi álggii veaddingeatnegasvuohta. Dat mearkkaša ahte beatnaga galgá báttis doallat dahje áidde siste atnit olgun čađat áigge go lea olgun.
