Suohkandoavttir vuorjašuvvá go Guovdageainnus leat oallugat geat eai leat boahkuid váldán.
Norga rahppo eambbo ja eambbo, seammás go njoammulogut lassánit.
Norgga alla boahkuhangráda dihte sáhttá servvodaga dál rahpagoahtit fas, muhto Guovdageainnus ii leat dat seamma gráda. Guovdageainnus lea okta Norgga vuolimus boahkuhangrádain, čállá suohkan iežaset neahttasiiddus.
– Dat dagaha ahte máŋggas min álbmogis leat erenoamáš suojeheamet. Mun vuorjašuvan go leat nu oallugat geat eai leat váldán boahkuid Guovdageainnus, dadjá suohkanváldodoavttir Anne Lajla W. Kalstad.
Guovdageainnu suohkan ávžžuha buohkaid váldit koronaboahkuid.
