Valáštallan oažžu earenoamáš ollu ruđa ruovttoluotta lassiárvodivatbuhtadusas 2018 ovddas. 138 valáštallansearvvi Finnmárkkus ožžot oktiibuot 7 miljovnna ruvnno.
Ruđat máksojuvvojit valáštallanservviide 52. vahkkus, ja oktiibuot ožžot Norgga valáštallansearvvit ruovttoluotta 605,7 miljovnna ruvnno lassiárvodivatbuhtadusa.
– Norgga valáštallanlihttu lea hui duhtavaš dán jagáš lassiárvodivatbuhtadusain valáštallamii. Go sihke ohccojuvvon ja máksojuvvon supmi lassána jagis jahkái, de lea čielggas ahte joavkkuid doaimmat lassánit. Dat duođaštuvvo maid miellahttologuin, dadjá valáštallanpresideanta Berit Kjøll preassadieđáhusas ja lasiha vel:
– Mii oaidnit ahte proseanttalaš lassáneapmi mávssus valáštallanservviide lea eambbo go valáštallamii obbalaččat. Lea buorre go leat valáštallansearvvit ja joavkkut mat ráhkadit doaimmaid.
