Sámi Našunálateáhter Beaivváš bovde bihtá álgočájálmassii Riikalávdái Oslos.
Dáid beivviid lea Sámi Našunálateáhter Beaivváš gárveme maŋemus buvttadusa man dahket Guovdageainnu kulturviesus, gos teáhter lea dállodallan máŋgalogi jagi. Teáhtera bargit illudit fárret fargga ođđa vistái mii gárvána giđđii.
– Mii háliidit musihkain loahpahit iežamet áigodaga kulturviesus, juste nu go álggaheimmet 43 jagi dás ovdal. Konsearttain «Váimmus váibmui» háliidit bovdet iežamet teáhtergehččiid musihkalaš vásáhussii gos beassat návddašit šuoŋaid mat leat komponerejuvvon teáhteris álggu rájes, muitala preassadieđu bokte Beaivváža diehtojuohkinjođiheaddji Brita Triumf.
– Čalmmustahttit earenoamáš barggu
Sámi Našunálateáhter Beaivváš ávvudii moatti jagi áigi 40 jagi, ja dán áigodagas lea komponerejuvvon ja buvttaduvvon oba ollu musihkka máŋggaid teáhterbuvttadusaide. Muhtimat leat beaggán sámi musihkkaoidun, ja ellet iežaset eallima ain dál 2023:s, ja muhtimat leat teáhtera vuorkkáin.
– Dáinna buvttadusain háliidit mii ovdanbuktit oasáža teáhtera musihkalaš historjjás ja čalmmustahttit dan earenoamáš barggu maid čeahpes šuokŋadahkkit, čuojaheaddjit ja neavttárat leat ráhkadan min čájálmasaide, mii lea hui dehálaš oassi sámi musihkkahistorjjás., dadjá Triumf.
Johtá
Álgočájálmas lea golggotmánu 27. beaivvi Riikalávddis Oslos, dasto dollet mátkái ja čájehit bihtá Troandimis golggotmánu 31. beaivvi, Bådådjos skábmamánu nubbi beaivvi, Álttás skábmamánu čihččet beaivvi. Mátki joatkašuvvá dasto ođđajagis.
Mielde leat:
Neavttárat/Vokalisttat: Egil Keskitalo, Mary Sarre, Iŋgor Ántte Áilu Gaup. Nils Henrik Buljo, Marte Fjellheim Sarre Musihkalaš jođiheaddji: Roger Ludvigsen Eará musihkkarat: Jonas Karlsen, Gjermund Silset, Andreas Gundersen Bagadalli: Rolf Degerlund
