– Juohke njealját jápminlihkohisvuhtii leat gárrenmirkkot seaguhuvvon, ja ráđđehus sáhttá olu bargat eastadit dán. Jus livččii alkohola-lássa, de livččii gádjon olu heakkaid, lohká Elisabeth Fjellvang Kristoffersen.
– Juohke njealját jápminlihkohisvuhtii leat gárrenmirkkot seaguhuvvon, ja ráđđehus sáhttá olu bargat eastadit dán. Jus livččii alkohola-lássa, de livččii gádjon olu heakkaid, lohká Elisabeth Fjellvang Kristoffersen.
Diibmá jápme 135 olbmo johtolagas, ja 700 roasmmehuvve bahuid Norgga johtolagas. Elisabeth Fjellvang Kristoffersen lea MA – Rusfri Trafikk organisašuvnna generálačálli.
Preassadieđáhusas son cealká ahte ii leat duhtavaš gárrenmirkoeastadandoaimmaiguin mat Našunála Johtolatplánas bohtet ovdan.
Dattetge lea duhtavaš go obbalaš mihttu lea oažžut loguid njiedjat.
Alkohola-lása
Son ohcala konkrehta doaimmaid mat eastadit gárrenvuođa vuodjima ja lihkohisvuođaid.
– Lea buorre go leat alla mihtut, muhto fertejit čielga doaimmat lassin daidda mat leat dál. Lea ain nu ahte juohke njealját lihkohisvuođas leat gárrenmirkkot seaguhuvvon, ja alkohola lea bealli dain. Buorre doaibma livččii bijahit alkohola-lása, vai sii geat leat dubmejuvvon promilla-vuodjimis, eai beasa nuppes šat vuodjit gárrenvuođas, lohká Kristoffersen. Stáda geaidnodoaimmahat lea maid buktán seamma evttohusa, fargga logi jagi.
Bussiide boahtá lássa
Ortnet lea USA:s ja Kanadas leamaš anus máŋgalogi jagi. Maiddái Suomas ja Ruoŧas lea dákkár ortnet. Kristoffersen moaitá ráđđehusa go eai leat bidjan alkohola-lása Našunála Johtolatplánii.
– Eai leat váldán mielde alkohola-lása eai ge eará doaimmaid maid diehtit ávkkuhit, lohká son.
Dán jagi boahtá alkohola-lássa bussiide ja mini-bussiide Norggas. Kristoffersena mielas lea buorre doaibma, muhto ii leat doarvái.
– Ođđa doaimmat eai boađe ieža, daid fertejit politihkkarat doibmii bidjat, lohká son.
