Dihtet go ahte sáhtát sáhkkohallat jus du sihkkelis eai leat čuovggat?
Jus sihkkelasttát čuovgga haga čakčaseavdnjadasas, de leat measta oaidnemeahttun eaige biilavuoddjis leat go moadde sekundda fuobmát du.
Biilavuoddji ii nagot fuobmát sihkkelvuoddji ovdal go lea 25-30 mehtera duohken. Arvedálkin lea oainnádat vel heajut. Go de oaidná sihkkelvuoddji, de sáhttá lihkuhisvuohta leahkit veadjemeahttun.
– Hui ollu biilavuoddjit leat healkkehan go luotta alde fáhkka iđista sihkkelvuoddji geas ii leat čuovga. Sihkkelis lea dasa lassin ollu stuorát leahttu go vázzi olbmos, danne lea dehálaš sáhttit oaidnit ja fuobmát sihkkelvuoddji buori áiggis. Diekkár dilis ii leat ollu mii galgá boastut mannat ovdal go lihkuhisvuohta dáhpáhuvvá, dadjá Trygg Trafikk senioraráđđeaddi David Tofthagen.
Jus dus leat sihke čuovggat ja šleđggon go sihkkelasttát, de biilavuoddji oaidná du 300 mehtera ovdal. Dainna lágiin sáhttá garvit várálaš dáhpáhusaid.
Alla sáhkku
Sáhttá leat heakkavárálaš sihkkelastit čuovgga haga, muhto dat lea maid lobiheapme. Sihkkelis galgá vilges dahje fiskes čuovga sihkkela ovddabealde, ja rukses čuovga maŋábealde. Dasa lassin galget šleđggonat duolmmaniin.
Jus dat eai leat de sáhttá sahkkohallat 1300 ruvnnuin.
– Oallugat eai dieđe ahte sihkkelis galgá čuovga sihke ovddabealde ja maŋábealde. Dasa lassin vuvdojit ain sihkkelat main eai leat čuovggat. Sii geat vuvdet sihkkeliid galggaše čeahpibun šaddat muitalit makkár gáibádusat leat čuovga- ja šleđggongeavaheapmái sihkkelis, dadjá Stáhta geaidnodoaimmahaga ráđđeaddi Astrid Kristiansen.
