NTB dieđihii ikte ahte ráđđehus geahpeda beliin mánáid čalbmeklássadoarjaga. Norges Blindeforbund oaivvilda ahte ráđđehus botke bušeahttasoahpamuša Sosialisttalaš Gurutbellodagain (Sg). Norgga čalmmehislihttu lohká ahte váhnemiid bursa ii galggašii mearridit besset go mánát go oaidnit vai eai.
Čalbmeklássaortnegis, mii ásahuvvui borgemánu 2022:s, čuoččuhii departemeanta ahte eaktu oažžut čalbmeklásaid, máksá 220 miljovnna kruvnna jahkái. Norges Blindeforbund, Norgga čalmmehisolbmuid lihttu, ii dorjon daid árvvoštallamiid ja čujuhii ahte departemeanta lei bidjan boasttu eavttuid vuođđun árvvoštallamii. Čalmmehisolbmuid lihttu oaivvildii ahte ortnet ii mávsse eanet go 80 miljovnna jahkái ja dál čájehuvvo sis ahte lei riekta.
– Muhto dálá čalbmeklássadoarjja ii govčča daid duohta goluid maid bearrašat fertejit máksit. Ortnet doarju dušše ovtta čalbmeklássapára jahkái ja ferte ieš máksit stuora iešmávssu. Doarjja addo dan ektuiman garrasat čalbmeklásat leat, vaikko čalbmeklásat mákset eanet, lohká lihttojođiheaddji Terje Andre Olsen preassadieđáhusas.
Eanemus doarjja lea 4975 kruvnna ja uhcimus doarjja lea 770 kruvnna. Jus čalbmeklásat mákset 10 000 kruvnna, de ferte ieš máksit 5000 kruvnna. Eanemus doarjja gusto čalbmeklásaide mat leat eanet go 10 garrasat. Iešmáksu lea 460 kruvnna beroškeahttá man garra čalbmeklásat leat. Dat gokčá sihke čalbmeklásaid ja čalbmeklássarámma.
– Dát ortnet ii leat doarvái buorre. SG soabai ráđđehusbellodagaiguin 220 miljovdnasaš čalbmeklássaortnega birra. Dál čájehuvvo ahte eavttut leat nu garrasat ahte dat geat dárbbašit ruđaid eai oaččo dan. Dalle ferte ráđđehus jorggihit ja dahkat nu mo mii soahpamet, lohká SG stuorradiggeáirras Freddy André Øvstegård ja lasiha:
– Olu mánát eai sáhte doaibmat čalbmeklásaid haga. Jus mánná dárbbaša čalbmeklásaid mat leat 12 garrasat, ja jus bearaš ii suitte máksit ođđa čálbmeklásaid, de váikkuha hirbmadit mánnái, deattuha lihttojođiheaddji Terje Andre Olsen.
