Mannan lávvordaga lei ušttagilvu Vuorašjávrris mii geasuhii ollugiid bálkut vuokka sihke gáttis ja fatnasis.
Mannan lávvordaga lei ušttagilvu Vuorašjávrris mii geasuhii ollugiid bálkut vuokka sihke gáttis ja fatnasis.
Ávžži gilisearvi lágida ušttagilvvu juohke geasi Vuorašjávrris, ja mannan lávvordaga ledje ollu olbmot vuolgán uštit vaikko lei hirbmat garra biegga jávrri alde. Vuokka lei váttis bálkestit vuostebiekkas, muhto divri aŋkke ii lean nu vallji.
Máŋganuppelohkái fatnasa ledje jávrris, ja moaddelogi olbmo ušte. Guollebivdit gesse sihke gáddái ja fatnasii gávcci rávddu, guokte dápmoha ja ovcci vuskona.
Guollevuoittut
Unnimus guolli dettii vihtta grámma ja Susanne Helén Hermansen vuittii 1000 ruvnno unnimus guliin. Stuorimus rávdduin vuittii Kirsten Karine Hætta 3000 ruvnno ja son oažžu pokálii iežas nama ja beassá váldit mielde ruoktot boahtte jahkái. Jus oažžu iežas nama golmma geardde pokálii, de lea vuoitán pokála, ii ge dárbbat šat buktit dan gilisearvái. Stuorimus vuskona gottii Tone Holten. Vuoskku dettii 670 grámma ja Holten vuittii 5000 ruvnno.
Eará vuoittut vuorbádeamis
Gilisearvi vuorbádii máŋga eará vuoittu maid maŋŋel go guollevuoittuid ledje juohkán. «Mitsubishi-varmepumpe» vuittii Johan Anders Pentha. Janome-goarrunmašiinna vuittii Inga Beate Bæhr ja Tiki-goallosvovnna vuittii Rávdná Turi Henriksen.
