Riddu Riđđu mielde lágideame:
Oslo World festiválas leat várren beaivvi goas álgoálbmogat leat fokusis. Riddu Riđu festiválajođiheaddji Sandra Márjá West mielas lea buorre beassat ovttasbargat festiválain ja buktit álgoálbmogiid musihka ja kultuvrra eanet oidnosii.
Oslos lágiduvvo dáid beivviid Oslo World festivála ja dan oktavuođas lágiduvvo Urban Indigenous Takeover golggotmánu 31. beaivvi Oslos. Olbmuin lea dat oaidnu ahte álgoálbmogat leat čadnon boaittobeale guovlluide ja sii leat čadnon iežaset eallinvuohkái. Iešguđetge oktavuođain de dat lea govviduvvon leat vuosteháhkun ođđaáigásaš, urbána eallinvuohkái.
Festivála Oslo Word čállá ahte dan govvideamis ii leat nu stuorra duohtavuohta dál. «Min riikkas lea Oslo dat stuorámus sámi gávpot, ja globála treanddat čájehit ahte álgoálbmogat fárrejit gávpogiidda»
Riddu Riđđu veahkkin lágidit
Urban Indigenous Takeover lágiduvvo SALT dáiddaguovddážis Oslos ja Riddu Riđđu lea mielde lágideamen doaluid oaivegávpogis.
Riddu Riđu festiválajođiheaddji, Sandra Márjá West lohká ahte Oslo World festivála háliida dán jagi loktet álgoálbmogiid iežaset festiválas ja dan oktavuođas sii leat ge váldán oktavuođa Riddu Riđđu Festiválain, vai sáhttet leat veahkkin ráhkadit prográmma Urban Indigenous Takeover.
– Riddu Riđus lea leamaš máŋga jagi ovttasbargu Oslo Worldain, nu ahte lei somá fas ovttasbargat singuin, dadjá Sandra Márjá West.
Lágidit digaštallamiid
Urban Indigenous Takeoveris lágiduvvojit maiddái digaštallamat main Sandra Márjá West, Maxida Märak ja «A Tribe Called Red» nammasaš joavkkuin, Tim «2oolman» Hill ja Ehren «Bear Witness» oassálastet. Riddu Riđu buvttadeaddji Alice Marie Jektevik lea digaštallamiid moderáhtor.
– Eanet ja eanet sápmelaččat orrot gávpogis, muhto nu dáhpáhuvvá ge maiddái Kanadas, gos leat hui olu álgoálbmot nuorat buolvvat geat bajásšaddet gávpogis. Mo dát váikkuha sidjiide ja sin identitehtii, gos leat sin deaivvadanbáikkit,t lea ge maid vuolggasadji A Tribe Called Red musihkkii, dadjá West.
Buorre arena
Son lohká Riddu Riđu ovddidit álgoálbmogiid musihka ja kultuvrra, nu sii barget ge birra jagi ovddidit dan. Son lohká leat buorren go álgoálbmogat ožžot dan arena Oslo World festiválas Oslos.
– Mu mielas lea hui somá ahte álgoálbmotmusihkka ja -kultuvra lea boahtán eanet oidnosii. Álgoálbmot galgá ieš beassat muitalit iežaset muitalusaid ja okta vuohki dan dahkat lea musihka bokte, dadjá Sandra Márjá West.
Beroštupmi lassánan
Oslo World festivála dieđiha ahte maŋimuš jagiid lea lassánan beroštupmi sámi musihkkii ja kultuvrii. «Dat lea juoidá maid mii oinniimet Oslo Worldas diimmá ISÁK-konsearttas, mii lei ge festivála stuorámus dáhpáhus.» SALT dáiddaguovddážis beassat guldalit digaštallamiid urbána álgoálbmogiid gažaldagaid birra. Dasa lassin leat dáiddárat geat čájehit iežaset dáidaga ja filbmačájálmasa «WE UP» álgoálbmotfilmma, mas davviguovlluid álgoálbmogiid HipHop artisttat leat mielde. Eahkedis de lea Parkteáhteris konsearta Maxida Märakiin ja Tribe Called Red joavkkuin.
