Trygg Trafikk direktevra čujuha loguide man olu olbmot leat jápman johtolagas dán jagi. Vaikko logut leat njiedjan, de ávžžuha olbmuid leat hui várrogasat johtit johtolagas, dán muttos áigge.
Trygg Trafikk direktevra čujuha loguide man olu olbmot leat jápman johtolagas dán jagi. Vaikko logut leat njiedjan, de ávžžuha olbmuid leat hui várrogasat johtit johtolagas, dán muttos áigge.
Dán rádjái leat 75 olbmo jápmán johtolagas dán jagi. Dat lea dat unnimus lohku máŋgga logijahkái.
Unnit logut
Mannan mánu rádjái ledje 75 olbmo massán heakka Norgga luottain. Dat lea 22 unnit go diibmá seamma áigge.
Trygg Trafikk direktevra, Jan Johansen, dadjá dát lea positiiva, muhto muittuha seammás ahte dál leat olu ođđa johtaleaddjit luottaid alde, ja dáhttu buohkaid johtit várrogasat.
– Ii leat go moadde vahkku dan rájes go skuvla álggii, ja máŋga duhát máná ja nuora, geain lea unnán johtolathárjáneapmi, vánddardit luottaid alde. Sii dárbbašit áiggi oahppat skuvlageainnu ja johtolatnjuolggadusaid. De lea dehálaš ahte rávisolbmot leat buorit ovdagovat. Mánát čuovvolit rávisolbmuid, nu ahte lea dehálaš jurdilit guktii movt láhtte johtolagas, vai leat buorre ovdagovvan, dadjá son.
Sivva máŋga lihkohisvuhtii
Johansen muittuha maid ahte go ii leat doarvái áicil, dat lea oasálaš sivva manne olu lihkohisvuođat čuožžilit.
– Dál go olbmot leat aitto geargan luomuin, de lea máŋga erenoamáš siva lihkohisvuhtii. Oallugat leat ain luopmomodusis ja leat hoahpus go gosage leat jođus. Dat, oktan dain ahte leat olu hearkkes johtaleaddjit olgun oktanaga, dagaha ahte ferte leat jođán fuomášit mii geavvá luotta alde.
16:s dušše borgemánus
Borgemánus masse 16 olbmo heakka, dain ledje guđas mohtorsihkkelvuoddjit ja guokte sihkkelasti. Johansen dadjá ahte Trygg Trafikk čuovvu loguid ovdáneami dárkilit.
– Mii registreret ahte logut man oallugat jápmet ja roasmmohuvvet johtolagas, sihke mohtorsihkkeliiguin ja sihkkeliiguin, eai njieja. Dán mii fertet váldit duođalažžan dadjá son.
– Jus dát logut galget njiedjat, de fertet mii buohkat jierpmálaš mearrádusaid dahkat johtolagas, lasiha son.
