Statnett sirdá doaimmaid guovlluide gos eai leat ealut.
Statnett sirdá doaimmaid guovlluide gos eai leat ealut.
Statnett dieđiha ahte unnidit doaimmaid geassemánu rádjái, boazodoalu dihte.
Muhtun guovlluin bissehit barggu, doppe gos ealut johtet dahje guottehit. Statnett sirdá barggu guovlluide gos eai guoskkat boazodoalu.
– Bissehit barggu
Muhtun sajiin soitet bissehit barggu dušše moatti diibmui dahje moatti beaivái. Guottetbáikkiin bissehit barggu guhkit boddui. Álttá oarjjabealde, Gáivuonvákki lulábealde ja Ivguvuovddi davábealde bissehit barggu máŋga mánu, eai ge álgge fas ovdal go maŋŋel geassemánu 20. beaivvi.
Statnett cealká preassadieđáhusas ahte sii čađat gaskka gulahallet orohagaiguin, gullan dihte goas ealut bohtet.
Čakčat fas bissehit bargguid, go mearkunáigi ja johtináigi fas álgá.
Eará bisseheamit
Gáivuonvákkis lea riebanfárbma, ja čivganáiggi ii beasa Statnett girdit helikopteriin ja bávkkuhit bávtti.
Muhtun sajiin leat maid boralottiid monnenbáikkit, ja doppe maid lea gielddus helikopteriin girdit monnenáiggi.
