-Almmuhus-
OĐĐASAT Uđas fierran Skirvvis

Uđas fierran Skirvvis

-

-

Odne iđđes fierai muohtauđas Skirvvis, geaidnu lea gitta jándora.

Finnmárkku fylkkagielda čállá preassadieđáhusas ahte odne iđđes lea fierran uđas Skirvvis, Álttá suohkanis, fylkageainnu 883 badjel. Fylkagieldda dieđuid mielde eai galgga olbmot leat váldon uđđasii.

Birrasiid 200 kubihka geađgi, láirá ja muohta dat lea fierran. Stáhta geaidnodoaimmahagas leat geologat báikkis árvvoštallamin dili. Geainnu diktet orrut gitta jándora, dan botta go geaidnodoaimmahat árvvoštallet dili.

Eará fievrrut
Finnmárkku fylkkagielda ovttasbargá Álttá suohkaniin gávdnan dihte čovdosiid mátkkošteddjiide. Eará fievrredan vuogit leat jo biddjon doibmii. M/S Mjånes fanas vuoddjá Girenjárgga ja Mikkelsby gaskka, vai olbmot besset oadjebasat johttit meaddel uđasbáikki.

Mjånes fatnasii čáhket 48 olbmo, muhto dat ii sáhte biillaid fievrredit. Vuosttaš vuolgga Girenjárggas lei diibmu 08.20 odne.

Dađistaga árvvoštallet gallii vel galgá fanas vuodjit, ja galget go eará fievrruid vel bidjat doibmii. Dán birra almmuhit 177finnmark.no siiddus.

- Advertisement -
-Almmuhus-