Suoma Sámedikkis jienastedje Anáris Sajosis bearjadaga ođđa presideantta Sámedikki válgabadjái 2020–2023. Tuomas Aslak Juuso oaččui stuora eanetlogu Anu Avaskari vuostá jienasteamis ja Juuso válljejuvvui nu Suoma Sámedikki presideantan.
Presideantta jienasteapmi leai gaskal Anu Avaskari ja Tuomas Aslak Juuso mas Juuso oaččui stuora eanetlogu. Dan 21 sámediggeáirasis dorjo 16 Tuomas Aslak Juuso. Nubbi evttohus lei Anu Avaskari, ja son oaččui fas 5 jiena.
Tuomas Aslak Juuso, Gáijot Ántte Issáha Duomas Áslat, gullá Giehtaruohttasii Gáijogiid siidii Gárasavvonis, ja lean bargan iešguđetlágan servodatguoski áššiiguin. Son lea bargan Sámedikkis ja riikkaidgaskasaš politihkas earret eará ON mearrádusain eamiálbmotvuoigatvuođaid birra. Dal lea álgán su goalmmát áigodahkii Sámedikki áirrasin ja dal son láidesta Suoma Sámedikki.
Son lea ovdal Ávvirii dadjan:
– Mun lean leamas olu ráđđádallamiin ja bargan oalle guhká álgoálbmotáššiiguin ja sámi áššiiguin. Dasa lassin lean čohkkán Suoma Sámedikki stivrras ja sátnejođiheaddjin joavkkus, nu ahte lean beassan oaidnit daid proseassaid ja doaibmavugiid mat Sámedikkis leat ja doaivvun dán leat ávkin. Mis leat olu proseassat jođus nugo luonddusuodjalusláhka, ruvkeláhka ja sámedikkeláhka.
Suoma Sámedikki várreságadoalli
Vuosttaš várreságadoallin válljejuvvui Anni Koivisto jienasteami bokte. Son vuitii jienasteami 14 jienain Anu Avaskari 6 jiena vuostá.
Anni Koivisto dehe Koivu-Jusse Ánne lea 28-jahkásaš servodatberošteaddji ja gielddapolitihkkár. Dát lea su vuosttáš áigodat Sámedikkis. Son lea bajásšaddan Ohcejogas. Son lea studeren ja bargan mánáin ja maŋemus jagiid son lea politihkken.
Son lea ovdal dadjan Ávvirii:
– Mun lean gearggus váldit badjelasan dakkár ovddasvástádusa maid Sámediggi lea gearggus addit munnje. Go lean nu bures sajáiduvvan politihkkii de lean gearggus geavahit mu máhtu ja čehppodaga go lean ovdal bargan Suoma láhkaásahemiin ja váikkuhemiin. Dal mun lea gearggus geavahit mu fierpmádaga mu iežan álbmogii buorrin.
Olles Suoma Sámedikki stivra
Jienasteami bokte válljejuvvui maid Leo Aikio Sámedikki nubbin várreságadoallin. Leo Aikio oaččui 12 jiena ja Kari Kyrö fas 8 jiena.
Suoma Sámedikki stivrii válgabadjái 2020–2023 válljejuvvojedje maid:
Magreta Sara, Anne Nuorgam, Juha Petteri Alakorva ja Veikko Feodoroff. Sin láidesta presidenta Tuomas Aslak Juuso ja guokte váraságadoalli Anni Koivisto ja Leo Aikio.
Ávvir lea geahččalan oažžut Juuso ja Koivisto ságaide. Sámedikki čoahkkin lea ain jođus.
