-Almmuhus-
OĐĐASATThai­eatnama muorje­čoaggit eai dáidde boahtit – šaddá lossat muorje­ealá­hussii

Thai­eatnama muorje­čoaggit eai dáidde boahtit – šaddá lossat muorje­ealá­hussii

Journalista

-

-

Koronavirusa geažil eai dáidde boahtit thaieatnama muorječoaggit dán jagi. Dát vuorjašuhttá ealáhusa. Ii leat sihkkar ahte ráđđehusa doaibmabijut veahkehit. – Justa dál orru hui lossat, lohká Frostab fitnodaga Anders Vestin Árvvesjávrris Ruoŧas. 

 Ii leat sihkkar ahte ráđđehusa doaibmabijut veahkehit muoreealáhusa.

– Justa dál orru hui lossat, lohká Frostab fitnodaga Anders Vestin Árvvesjávrris Ruoŧas. 

Jahkásaččat bohtet gaskkal njeallje ja guhtta duhát thaieatnama muorječoaggi Ruŧŧii. Koronovirusa dihtii lea Thaieanan ásahan sierradili. Nu mo dilli lea dál, sáhttá šaddat váttisin oažžut buot ortnegii ovdal geasi. Vaikko ráđđehus dieđihii ahte muorječoaggit sáhttet beassat riikii, muhto jus navdet čoaggis lea njoammudávda, de sáhttet su bissehit. 

– Lea measta veadjemeahttun  molsut thaieatnama muorječoggiid ruoŧa muorječoggiiguin. Dalle dárbbašat beali eambbo olbmuid, lohká Anders Vestin, gii lea Frostab muorjeoastin fitnodaga jođihangottis Árvvesjávrris. 

Vaikko su mielas orru measta veadjemeahttun organiseret birrasii logiduhát ruoŧŧelaš muorječoggiid dán geasi, de ii leat áibbas vuollánan. Anders Vestin lohká go dán guovtti maŋimuš geasi leamaš hui heajus geasit, de árvvoštallá son ahte kilohaddi lassána ja dat soaitá geasuhit muorječoaggimii. 

– Stuorra bargguhisvuohta, buorre kilohaddi ja olu muorjjit meahcis, de jáhkán mii oažžut olu ruoŧŧelaččaid meahccái murjet, lohká Anders Vestin Árvvesjávrris, SVT.se

-Almmuhus-