Lášmmohallanrusttegat mat leat biddjon čierastanluohkkái Kárášjogas, eai bállen ráfis.
Ole Isak Strømeng vázzá hui dávjá čierastanluohkás mii lea das Kárášjoga márkanbáikkis. Muhto go dál maŋŋel vahkkoloahpa finai fas doppe, fuomášii son ahte rusttegat mat leat biddjon dohko, leat billistuvvon. Viđa hárjehallanbeŋkii ledje čuggon ráiggiid olggožiidda. Orru dego ságge soppiin lea čuggon daid.
– Lea surgat go bilidit. Dát han ledje áibbas ođđa biergasat mat leat biddjon dohko vai olbmot besset hárjehallat olgoáimmus. Dál dat njusket dieđusge visot ja billahuvvet, dadjá Strømeng.
– Dáidet mánát
Strømeng ii oro jáhkkime gal ahte jur ollesolbmot diekkáriid barget
– Sihkkarit lea mánát, in jáhke jur ollesolbmuid čuoggut ráiggiid biergasiidda. Galggašedje gal diktit ráfis. Ii lea dárbu bilidit biergasiid mat leat biddjon buoredáhtus min buohkaid váste, dadjá Strømeng.
3 mánu bállen
Kárášjohkalaččat vázzet ge áŋgirit dán čierastanluohkkái birra jagi. Skábmamánu loahpas biddjoje dohko vel iešguđetlágán hárjehallanrusttegat, mat dábálaččat lávejit viesu siste. Jurdda lei ahte olbmot galget báhkkanit vuos gizzut luohkkái, doppe lovttohallat ja hárjehallat, ja de fas vázzilit vulos.
Ferte geasset viežžat
Nordlys valáštallansearvi eaiggáduššá dál rusttegiid. Nordlys jođiheaddji Egil Olli mielas ii ge dieđusge oro mange veara go ná lea.
– Lea váivi go eai bálle ráfis. Eai hal diet leat dahkan oktiige bahá, dušše buori. Mun gal imaštalan go diehko gillejit mannat bilidit. Sáhttet gal dieđusge mánát bargan dán, geat eai leat jurdilan. Muhto aŋkke, dál fertet geasset viežžat daid vulos ja geahččat maid sáhttá bargat, dadjá Egil Olli.
Ávžžuha sponset
Gielddadoavttir Amund Peder Teigmo dat lei áŋgiruššan dáid oažžut dohko sierra prošeavtta bokte, ja ávžžuhii vel birra jagi lihkadit. Teigmo ii suorgan gal ovttatmanos go gullá dán:
– Ii leat nu ollu billistuvvon, dušše olggožat. Lea gal dieđusge váivi go olbmot bilidit nuvttá fálaldaga mii lea rabas buohkaide, dadjá Teigmo. Son lohká iežas leat positiiva olmmožin, ja háliida ain hástalit kárášjohkalaččaid:
– Geavahehpet daid rusttegiid, ja hástalan vel seammás ealáhussearvvi sponset eambbo rusttegiid, dadjá son.
