Supersonalaš bombagirdi doddjui ja bávkkehii buot dollan go deaivvai seaivunšilju mii lei murkku siste.
Lea The Barents Observer mii čállá dáhpáhusa birra ja almmuhii filmma mas oaidná go girdi galgá seaivut ja de manná boastut.
Doddjo, bávkkeha ja buollá
Golmmas dušše lihkohisvuođas ja njealját olmmái lea bahut roasmmohuvvan dáhpáhusas mii lei ođđajagemánu 22. beaivvi Olenegorskas.
Girdibáikkis lea almmuhuvvon filbma sihke Twitterii ja Youtubii, ja máŋga Ruošša media leat maid almmuhan dan filmma mannan vahkkoloahpa.
Seaivunšiljus lea murku, ja 12 sekundda maŋŋel go čuovggat ihtet murkku siste, de doddjo girdi go geahččala seaivut.
Girdi bávkkeha ja buollá seammás go doddjo.
Bombagirdiid šillju
Olenegorska lea sullii 11 miilla Murmánskka gávpoga lulábealde.
Girdišillju lea guhkimus seaivunšillju Guoládagas ja lea bombagirdiid strategalaš girdišillju.
Diekkár bombagirdit eai oro čađat davviguovlluin, čállá Barents Observer.
