Ruošša mediabearráigeahčču ii dohkkehan artihkkala mas čálle iešsorbmema birra.
The Barents Observer aviisa giddejuvvui Ruoššas ođđajagimánus dán jagi maŋŋel go čálle homofiila dievddu birra gii lei jurddašan iežas sorbmet.
Odne bearjadaga lea dát Norgga neahttaaviisa dikkis Ruoššas. Sii gáibidit rahpat fas aviissa Ruošša lohkkiide.
Aviisa čálii ruoŧabeal sápmelačča Dan Erikssona birra, maiddái ruoššagillii. Mediabearráigeahčču Roskomnadzor ii dohkkehan čállosa, ja oaivvildit iešsorbmengeahččaleapmi rihkkut Ruošša lága. Sii adde aviisii 24 diibmosaš áigemeari sihkkut artihkkala, muhto aviisa biehttalii.
– Mii leat bures ráhkkanan ja mis lea fárus lingvistihkkačeahppi gii dárkilit lea guorahallan čállosa, dadjá redaktevra Thomas Nilsen The Barents Observeris. Sii gáibidit ahte Ruoššas rahpet fas maid leat gidden almmolašvuođas, čállá Aftenposten.
Artihkal lei homofiila ruoŧabeali sámi dievddu Dan Erikssona birra, gii muitalii son lea guktii geahččalan heaittihit eallima go vásihii garra ovdagáttuid ja vuostehágu homofiiliija dihte. Dan ášši lei Arjeplognytt ovddemus almmuhan.
(Gáldu: NTB)
