Duorastaga eai beasa Rájijovsset rádjestašuvnna čađa ge boahtit Ruoššas Supmii.
Suoma ráđđehus lea mearridan giddet buot rádjerasttildangeainnuid Ruššii. Rádji giddejuvvo buotlágán mátkkoštemiide, earret gálvojohtolahkii, duorastaga rájes dán vahku.
– Ráđđehus lea odne mearridan giddet buot rádjerasttildanbáikkiid nuortarájis, cealká stáhtaministtar Petteri Orpo distaga. Rádjegidden bistá álgovuorus juovlamánu 13. beaivái, dieđiha ges sisriikaministtar Mari Rantanen.
Moadde čuođi dorvoohcci
Suomas leat oktiibuot ovcci rádjerasttildanbáikki Ruošša guvlui ja Eurohpas lea Suopma dat riika mas lea guhkimus rádji Ruššii nannámis, 1340 kilomehtera. Maŋimus vahkkuid leat gidden gávcci rádjerasttildanbáikki, ja áidna mii vel lei rabas, lei Raja-Jooseppi. Dat lea 15 miilla lullelis Storskog, mii lea Norgga áidna rádjestašuvnna Ruššii.
Moadde čuođi olbmo leat boahtán Ruošša ja Suoma gaskasaš rádjestašuvnnaide maŋemus vahkuid ohcat dorvvu. Suopma oaivvilda ahte Ruošša sádde iešdáhtus dorvoohcciid Supmii ja leat gohčodan dan hybriidafalleheapmin.
Hilgu čuoččuhusaid
Suoma olgoriikkaetáhta dieđuid mielde bohtet dorvoohccit máŋgga riikkas, earret eará Jemenis, Afghanistanas, Kenias, Marokkos, Pakistanas, Somalias ja Syrias.
EU lea sádden 50 rádjegoziheaddji veahkehit Suoma hálddašit rádjerasttildemiid. Ruošša lea šiitán sii dat sáhtostit dorvoohcciid Suoma riikkaráji ala.
– Suoma eiseválddit leat álgán ohcat ákkaid vai ovddidit ruoššafobialaš guottuid, dadja Ruošša olgoriikkadepartemeantta ovddasteaddji Maria Zakharova.
(@NTB)
