Odne mearriduvvui Suoma riikkabeivviin, ahte sámediggeláhka ii ođasmahtto. – Golmma jagi bargu manai duššás, dadjá Suoma sámedikki njunuš Klemetti Näkkäläjärvi.
Suoma Sámedikki golbma ságadoalli ledje hui beahtahallan maŋŋel go Suoma riikabeaivvit mearridedje hilgut ođđa sámediggeláhkaevttohusa.
Klemetti Näkkäläjärvi dadjá YLE Sápmái ahte seammás Suopma lávkii maŋos olmmošvuoigatvuođain.
Ii lean jáhkkán
Klemetti Näkkäläjärvi gal lei jáhkkán dat manná bures.
– Gal dat osku lei hui garas dasa ahte dat galgá mannat bures, go leimmet ožžon dan ráđđehusprográmmii ja dat lei ráđđehusa evttohus. Ráđđehusbellodagat eai mannan dan duohkái, vaikke dat lei jo kompromissaid boađus. Dat lea issoras dilli, ahte ii sáhte luohttit alimus mearridanorgána lea guođđán vuhtii válddekeahttá dan man ovdii ieš lea hui duođas bargan, dadjá son Ylei.
Henriksson gesii evttohusa
Vuoigatvuohtaministtar Anna-Maja Henriksson (ráb) geassá sámediggeláhkaevttohusa eret riikkabeivviin. Henriksson lea dadjan ahte sus eai leat šat navccat bargat dainna áššiin ja ahte son lea čađa váiban. ILO 169 -soahpamuša ovdáneamis ii leat vel diehtu, čállá maid Yle Sápmi.
Illudit maid
Dát mearrádus lea bohciidahttán máŋggalágán dovdduid suomabeale Sámis. Okta joavku, mii illudii bohtosiin, lei Vuovde-, guolástan ja duottarsámit -searvi, mii čálii dálan jienasteami maŋŋá almmolaš Facebook-siiddus, ahte golmma jagi nuvttá eaktodáhtolažžan dahkkon bargu buvttii bohtosiid.
