Dán vahkkus lea suodjalusas hárjehallan Mátta-Romssas.
Guovvamánu 14 beaivvis 17. beaivái lágida suodjalus «Rein 1» nammasaš hárjehallama Mátta-Romssa siseatnamis.
Hárjehallamis oassálastet birrasii 1800 Brigade Nord soalddáha ja bargi. Hárjehallamis geavahit 500 mohtorfievrru ja dás leat váikkuhusat guovllu johtolahkii.
– Hárjehallama geažil šaddet mátkkálaččat vuordit ja danin ávžžuhit olbmuid dasa ráhkkanit, lohká Stáhta geaidnodoaimmahaga johtolatguovddáža sekšuvdnajođiheaddji Siril Veiåker Nilsen preassadieđáhusas.
Johtolatdieđáhusat
Stáhta geaidnodoaimmahat ávžžuha mátkkálaččaid čuovvut johtolatdieđáhusaid vegvesen.no/trafikk neahttasiiddus jus áigot johtit Mátta-Romssas dán vahkkus. Maiddái Suodjalus juohká dieđuid hárjehallama birra.
Suodjalushárjehallan váikkuha johtolaga erenomážit dáid geainnuin:
E6 Seahtarmuvas Gieddenjunnjái
Fylkkageaidnu 851 Brandvollas Vuotnasiidii, guoská maid Skirrejeaggegeidnui mii lea fylkkageainnus 7812.
Fylkkageaidnu 84 Salangsverket – Vuotnasiida – Deannjá.
