Egil Utsi girji «Medisinsk lommeparlør: norsk-samisk» deaddiluvvui vuosttaš geardde 1998:s, muhto dat ii leat šat leamaš oažžumis girjin.
Sámediggeráđđi lea juolludan guovtti dearvvašvuođaprošektii doarjaga. Sii addet 104 500 ruvnno doarjjan Davvi Girji AS:i, mii áigu ođđasit deaddilit Egil Utsi girjji «Medisinsk lommeparlør: norsk-samisk», ja 171 000 ruvnno doarjjan Hábmer suohkanii julevsámi dearvvašvuođajoavkku ovdaprošektii. Nu čállet sii preassadieđáhusas.
Dehálaš veahkkeneavvu
– Girji lea dehálaš veahkkeneavvu dearvvašvuođabálvalusas ja berre leat olamuttos dearvvašvuođabargiide miehtá riikka. Dát veahkkeneavvu sáhttá váikkuhit dasa ahte sámi álbmot oažžu buoret dearvvašvuođabálvalusaid, go pasieanta váldojuvvo vuostá sámegielain. Lágádusas eai šat leat eanet dakkár girjjit, ja danne lea hui buorre go girji deaddiluvvo ođđasit, dadjá sámediggeráđđi Runar Myrnes Balto (NSR) preassadieđáhusas.
Dan dihte go girji deaddiluvvui vuosttaš geardde 1998:s, de lea dárbu heivehit girjji dálááigge hábmemii, dihtor- ja deaddilanvuogádagaide ovdal go dat deaddiluvvo.
104 500 ruvdnosaš doarjja addo doarjjaortnegis Doarjja dearvvašvuođa-, fuolahus- ja mánáidsuodjalusprošeavttaide.
Doarjja Julevsámi dearvvašvuođajoavkku ovdaprošektii
Seamma doarjjaortnegis juolluduvvo maid 171 000 ruvdnosaš doarjja Hábmer suohkanii, mii áigu ásahit Julevsámi dearvvašvuođajoavkku mii galgá áimmahuššat sámi pasieanttaid, sin oapmahaččaid ja Julevsámi báikkálašservodaga. Prošeakta galgá huksejuvvot Lulli-Sámi dearvvašvuođajoavkku Saemien healsoedåehkie málle mielde ja eará álgoálbmotguovlluid málliid mielde.
– Sámi dearvvašvuođajoavkku bokte lea vuogas áimmahuššat sámi pasieanttaid ja guovllu álbmoga, nu ahte bálvalus dainna lágiin šaddá eanet olamuddui Julevsámi álbmogii, dadjá Myrnes Balto preassadieđáhusas.
– Dehálaš ovdaprošeakta
Sámediggeráđđi oaivvilda ahte dearvvašvuođavuogádat maid sápmelaččat áimmahuššet, ahte bálvalusas lea doarvái sámi gelbbolašvuohta ja ahte sámi giella ja kultuvra váldojuvvo mielde bálvalussii, lea dehálaš addin dihte sámi álbmogii seammaárvosaš dearvvašvuođabálvalusaid.
– Dat lea maid dehálaš go jurddaša bálvalusa pasieantasihkarvuođa ja kvalitehta birra, dadjá Myrnes Balto.
Julevsámi dearvvašvuođafierpmádat Julevsáme Varresvuodaværmdahka, Hábmera suohkana ja Nordlánddabuohcceviessu dat ásahit julevsámi dearvvašvuođajoavkku, ja sii leat maid prošeaktaeaiggádat.
