Harald Gaski lea ožžon Vaartoe/CeSam dieđalaš bálkkašumi dan barggu ovddas maid lea bargan sámi girjjálašvuođa ovddas.
Harald Gaski dadjá UiT Norgga árktalaš universitehta neahttasiiddus ahte son lea dušše joatkán dainna maid mánnán lea oahppan, namalassii ahte maid juo bargá, dan bargá albmaládje.
Son lea almmuhan badjel 20 girjji ja ovdal ožžon máŋga bálkkašumi su barggu ja girjjiid ovddas, earret eará davviriikkalaš “Gollegiella” bálkkašumi. Uit čállá ahte son atná Vaartoe/CeSam dieđalaš bálkkašumi hui stuora gudnin oažžut.
– Lea erenoamáš illudahtti ja gudnin go lea dieđalaš bálkkašupmi vel, dadjá vuosttašamanueansa Gaski universitehta kultuvrra- ja girjjálašvuođainstituhtas.
30 jagi njunnošis
Son lea badjel 30 jagi dutkan ja ovdanbuktán sámi girjjálašvuođas. Bálkkašumi addet go Gaski lea leamaš njunnošis hukseme sámi girjjálašvuođa fága.
– Gaski lea huksen sámi girjjálašvuođa UiT:s, ja lea dovddus olmmoš internašunála dásis maid dán suorggis. Sus leat viiddis dieđalaš barggut sihke našunála ja internašunála dásis ja máŋggabealát ja viiddis gelbbolašvuohta, ákkastallet sii.
Juste nu boaris
– Jus mun livččen nuorat, in livčče ožžon sámi muitalanárbevieru, myhtaid ja sátnevádjasiid bajásšattadettiin. Jus livččen boarrásit, de in ges livččii beassan studeret universitehtas, in ge bargat sámi giela ja kultuvrra ovddidemiin, dadjá son uit.no:ii.
Bálkkášupmi lea 25.000 ruvnno ja addo Harald Gaskii virggálaččat Upmi universitehtas miessemánu 30.beaivvi.
