NSR parlamentáralaš jođiheaddji Runar Myrnes Balto lohká iežaset vuhtii váldán Stáhta mearrádusa, muhto oaivvilda ahte lea boasttu mearrádus.
– Eat mii sáhte eará go váldit vuhtii mearrádusa, muhto dat ii mearkkaš ahte mii eat sáhte bargat viidásat áššiin. Mii guoská álbmotrivttiid ektui, de lea min oaidnu ahte stáhta mearrádus lea boastut. Mu mielas lea váivi go Fálesnuori suohkanstivrra eanetlohku ii leat váldán sámi beroštumiid ja dárbbuid vuhtii iežaset mearrádusas, lohká Runar Myrnes Balto.
LOGA ÁŠŠI: Vuordá ahte Sámediggi dohkkeha stáhta mearrádusa
Vuosttaš lávki loktet ášši dievasčoahkkimii
Runar Myrnes Balto čilge ahte Sámedikki eanetlohku lea dál ovddideamen Nussir-ášši sierra áššin dievasčoahkkimii mii lea Kárášjogas dán vahku.
– Mii oaivvildat ahte ráđđehusa mearrádus lea boastut, mii eat leat ovttaoaivilis mearrádusain. NSR oaidnu lea ahte mii ain doarjut sin geain leat vuoigatvuođat guovllus, nu go boazodoalu. Mii dál álggos loktet ášši dievasčoahkkimii, nu ahte Sámediggi sáhttá buktit cealkámuša áššái. Boahtte lávki lea digaštallat maid Sámediggi galgá áššiin bargat viidásat, dadjá Myrnes.
Ohcalit eambbo dieđuid
Sámediggi ii sáhte šat váidit áššemeannudeami, ja Nussir ASA beassá álggahit ruvkke Fálesnuorrái.
– Gávdnojit iešguđet vejolašvuođat mo Sámediggi sáhttá doarjut riekteguoddi dán áššis. Mis lea dál dárbu oažžut dieđuid maid mearrádus sisttisdoallá. Mii eat dieđe ovdamearkka dihtii mo váidudeaddji doaibmabijut čuhcet orohahkii, ja lea ollu maid eat vuos dieđe. Lea juoidá boastut vuogádagas go dakkár mearrádusaid sáhttet váldit, dadjá Runar Myrnes Balto.
– Gánske lea dál áigi luoitit ášši
Nordkalottfolket sámediggeáirras Toril Bakken Kåven ii loga iežaset joavkku mearridan áššis dorjot go NSR vai eai.
– Mii eat dieđe maid NSR ovddidit iežaset áššis, eat ge leat mearridan maide dan ektui. Mu vuosttaš jurdda dán áššis lea dieđusge ahte ii lean buorre mearrádus go dál addet lobi álggahit ruvkke. Gažaldat lea maid mii galgat viidásat bargat. Gánske lea dál áigi luoitit ášši, go mii leat dorron vuostá ja dál soaitá áigi dohkkehit ahte mii leat vuoittáhallan. Dat ii mearkkaš ahte mii leat duhtavaččat, muhto demokratiija eanetlohku lea mearridan, dadjá Toril Bakken Kåven.
