NSR jođiheaddji ávžžuha olbmuid ain doarjut Jovsset Ánte Sara.
Bearjadaga bođii diehtu ahte Jovsset Ánte Sara lea dahkan priváhtarievttálaš šiehtadusa, mii mearkkaša ahte sus báhcet 75 heakka jagi 2019 loahpas, ja nu ollašuhttá stáhta gáibádusa.
Norgga Sámiid Riikasearvvi (NSR) luohttámušolbmot leat čoahkkanan Skáidái Fálesnuori suohkanii dán vahkkoloahpa. NSR jođiheaddji Runar Myrnes Balto álggahii sátnevuoru ja muitalii ahte dán guovllus lea ollu sámepolitihkalaš áššit čuožžilan, earret eará Jovsset Ánte Sara ášši.
– Dáppe lahkosis lea Jovsset Ánte eallu gárddis. Stáhta lea viggan bágget su njuovvat ealu, ja otne de čuoččuha leat gávdnan čovdosa áššái, muhto min dieđuid mielde lea dát čoavddus stáhta čilgehus. Min áddejupmi lea ahte stáhta lea bággen Jovsset Ánte addit stuorra oasi ealustis earáide, vai ii sáhkohala 4-5 millijovnna ruvnnuin, dadjá Runar Myrnes Balto.
Berre vuordit ON
– Mii berret ain čájehit doarjaga Jovsset Ántii, dadjá Myrnes Balto. NSR oaivvilda ahte stáhta berre vuordit ON olmmošvuoigatvuođalávdegotti cealkámuša áššis. Jovsset Ánte Sara lea váidán Alimusrievtti bággonjuovvanduomu ON olmmošvuoigatvuođalávdegoddái, muhto Norgga stáhta ii leat čájehan beroštumi vuordit dassái go ON meannuda váidaga.
Lávvardaga lea NSR plánen tuvrra Fálá orohaga gárddi lusa, čájehan dihtii doarjaga Jovsset Ántii. Tuvra lea eaktodáhtolaš, Runar Myrnes Balto lohká iežas maid áigut vuolgit dohko čájehan dihtii doarjaga.
Eat fitnen ságaide
Ávvir lea geahččalan oažžut ságaide Jovsset Ánte Sara ja su advokáhta Trond Biti, muhto eat leat lihkostuvvan.
