Sámediggeráđđi Thomas Åhren reagere garrasit maŋimus beivviid govva- ja videoleavvama dihte sosiála mediain jápmán ja bealleheakkas bohccuin. Dál háliida son ođđa geahčadeami Norgga boraspirepolitihkas.
Sámediggeráđđi Thomas Åhren reagere garrasit maŋimus beivviid govva- ja videoleavvama dihte sosiála mediain jápmán ja bealleheakkas bohccuin. Dál háliida son ođđa geahčadeami Norgga boraspirepolitihkas.
– Govat, filmmat ja boazoeaiggádat ieža muitalit áibbas eará muitalusa go dan maid mii gullat Norgga fuođđo- ja birasgáhtteneiseválddiin. Dilli lea duođalaš, danin go dat čuohcá garrasit sihke elliide ja olbmuide ja ealáhusaide maidda dát guoská. Áibbas boasttu govva lea addojuvvon, sihke boraspiriid logu ektui ja vahágiid maid dat dagahit, cealká Åhrén preassadieđáhusastis.
Åhrén mielas lea mearkkašahtti veara ahte dan botta go boazoeaiggádat ja Finnmárkku fylkkamánni raporterejit buriid guohtumiid ja bohccuid buori vuoimmis jođidettiin geasseorohagaide, de dieđihit aŋkke buori muddui stuora váttisvuohtan ahte miesit borahallet boraspiriide.
– Govviduvvon fantasiijan
Son čujuha erenoamážit maŋimus beivviid muitalusaide vahágiid birra maid goaskin lea dagahan, ja deattuha ahte govat ja videoduođaštusat hui čielgasit čájehit ahte goaskin dagaha ollu eanet vahága go eiseválddit dássážii leat miehtan dovddastit.
– Bohccot maid goaskin lea goddán dahje bealleheggii biinnidan, leat dássážii govviduvvon dušše boazodolliid fantasiijan. Go boazodoallu lea miehtan nuppástuhttit ealáhusa, nu ahte šaddá dássádat gaskal ealuid ja guohtumiid, de vuorddán ahte eiseválddit čájehit dáhtu dahkat maid sii sáhttet vai oažžut ekologalaš ja ekonomalaš dássádaga ealáhussii. De eat sáhte garvit rievdadusaid boraspirepolitihkas, lohká Åhrén.
Sámediggeráđđi áigu álggahit stuorit boraspirepolitihkalaš ovttasbarggu gaskal Sámedikki ja boazoealáhusa, ja bovde seammás Stuoradikki bellodagaid viiddis digaštallamii boraspirepolitihka čalmmus goluid birra digaštallat, sihke maid bohccot ja olbmot šaddet gillát.
Ihttá báberáviissas logat eanet dán lihkadusa birra mii sosiála mediain dáhpáhuvvá.
