Porsáŋggu ovddeš gielddadirektevra Bente Larssen lea virgáduvvon Davvi-Norgga guovlludirektevran KS:s.
– KS lea ilus go Bente Larssen lea váldán vuostá fálaldaga šaddat KS ođđa guovlludirektevran Davvi-Norggas. Son lea bargan KS beaivválaš jođiheaddjin Leavnnja kantuvrras, ja dovdá nu KS hui bures ovdalaččas. Sus lea guhkes hárjáneapmi politihkalaš bargguin ja heive bures dán virgái, dadjá KS guovlludirektevra Geir Runar Johannessen preassadieđáhusas.
Bente Larssen lea leamaš suohkandirektevra máŋgga suohkanis Finnmárkkus ja sus lea maid hárjáneapmi Finnmárkku stáhtahálddašeaddji kantuvrras. Son lea maid jođihan KS guovddáš suohkandirektevralávdegotti 2017 rájes 2021 rádjai.
FeFo ođđa direktevrra maŋis
Máŋggajagáš regiovdnadirektevra Tom Mikalsen heaitá dál ja álgá Finnmárkkuopmodaga (FeFo) ođđa direktevran. Dál čuovvola Larssen su bálgá.
– Mun lean gearggus álgit dán virgái ja boađán leat oidnosis ja olámuttos miehtá regiovnna. Áiggun váikkuhit dasa ahte KS doarju Davvi-Norgga suohkaniid, dadjá Larssen preassadieđáhusas.
Buot suohkanat ja fylkkasuohkanat leat miellahtut KS:s, suohkansektora organisašuvnnas. KS lea suohkaniid ovdánahttinguoibmi, mii fuolaha suohkansektora beroštumiid stáhta eiseválddiid ektui ja lea suohkaniid ja fylkkasuohkaniid guovddáš bargoaddiorganisašuvdna.
KS Davvi Norggas leat kantuvrrat Bådådjos, Romssas ja Leavnnjas.
