Son lea geahččalan beassat Oslo politiijameašttirin, vearrodirektevran, preassagenerálan, finánsadirektevran ja dál ges NRK Sámi direktevran.

Thorbjørn Gaarder (59), guhte lea Oslos eret lea okta dain guhttasis geat leat ohcan beassat NRK Sámi hoavdan.

Gaarder lea ovdal beaggán riikkamediain go galgá leat okta Norgga áŋgireamos bargoohcciin. Son lea máŋggat hoavdavirgái geahččalan ohcat muhto dássážii ii leat lihkostuvvan vuos, čálii Dagbladet 2013:s.

Odne lea NRK Sápmi almmuhan ohcciid listtu, ja lassin Gaarderii leat vihtta eará ohcci virgái. Dát leat ohcan:

1 Gaarder, Thorbjorn (59), 0355T Oslo, Norga

2 Varsi, Magne Ove (55), Journalista, 1458 Fjellstrand, Norga

3 Kalstad, Johan Ailo (36), Resursahoavda, 9520 Guovdageaidnu, Norga

4 Eira, Sara Beate (32), Journalista, 9514 Áltá, Norga

5 Solbakk, Mona (43), Beaivválaš jođiheaddji, 9147 Birtavárri, Norga

6 Slyngstad, Ole Christian (25), Oahpaheaddji, 3089 Holmestrand, Norga

Hoavddas galgá leat alimus doaimmaheaddjiovddasvástádus NRK Sámi fálaldaga ovddas. Hoavddas viidásat lea bajimus hoavda birrasiid 100 bargi ovddas. Ovddasvástádussii gullá strategiijaovdánahttin, sisdoallobuvttadeapmi, beaktilis doaibma, bargit ja ekonomiija.

Hoavda Nils Johan Heatta almmuhii cuoŋománu 24. beaivvi ahte heaitá. Heatta lea doaibman NRK Sámi hoavdan 1985 rájes.