Otne lea rabasbeaivi Kárášjoga dáiddaskuvllas, gos guossit besset oaidnit ohppiid dáidagiid ja mo ráhkadit iešguđet lágán dáidda.
Otne lea rabasbeaivi Kárášjoga dáiddaskuvllas, gos guossit besset oaidnit ohppiid dáidagiid ja mo ráhkadit iešguđet lágán dáidda.
Kárášjoga dáiddaskuvllas lei otne iđitdiimmuid vuođđoskuvlla vuosttašluohká mánát guossis, stuorra illu sihke Dáiddaskuvlla ohppiide ja mánáidskuvlla mánáide, geat viššalit gažadedje dáiddaskuvlla ohppiid, geat leat čájeheamen iežaset dáidda ja barggu otne. Geahča video mo Lisa Márjá Boine ráhkada oaiveskálžžu leairras vulogeahčen áššis.
Miellagiddevaš
Vuosttašluohká gulahallan oahpaheaddji Berit Inger Alette Hætta Gaup mielas lea miellagiddevaš finadit Dáiddaskuvlla guossis.
– Mii vázzit dás ja geahččat dáidagiid, dát boktá mánáid kreativitehta go besset vásihit iešguđet perspektiivva dáidagis. Hui somá go unnimusat maid besset oassálastit. Beaivet lea mis ge vejolašvuohta searvat rabasbeaivái, lohká Gaup.
Somás beaivi
Dáiddaskuvlla oahppi Lisa Márja Boine mielas lea hui somá go mánáidskuvla vuoruhii boahtit ja lohká mánát viššalit nevvo ja gažadedje su. Boine lea ráhkadeamen oaiveskálžžu leairras.
– Somá čájehit iežan barggu ja erenomáš go mánát jerret ja čájehit stuorra beroštumi bargui. Addá munnje eambbo movtta go beasan muitalit sidjiide maid mun lean oahppan. Lea hui somás beaivi, lohká Lisa Márja Boine ja lasiha dát skuvllajahki leamašan miellagiddevaš ja somá.
Dehálaš čájehit skuvlla
Dáiddaskuvlla lea jahkásaččat lágidan rabasbeaivvi, rektor Eva Aira lohká dehálažžan čájehit maid oahppit barget.
– Lea dieđusge hui somás beaivi, go beassat čájehit iežamet skuvlla ja bargguid. Olbmot leat hui sáhkki maid dáiddaskuvllas barggat ja dá lea vuohki čájehit iežamet skuvlla álbmogii, lohká Aira guhte lei hui huššasis go Ávvir finadii guossis.
