Norgga stádaministtar Erna Solberg lohká ahte departemeantastruktuvra ja stáhtaráđđelohku sáhttá rievdat jus Gurut searvá ráđđehussii.
Go Olgeš, Ovddádusbellodat ja Gurut álge ráđđehusšiehtadallamiiguin, de logai Erna Solberg (Olgeš) ahte lea mielas rievdadit vuogi movt ráđđehus lea huksejuvvon.
– Go álgá šiehtadallat, ja galgá hábmet ráđđehusa, de ferte geahččat movt departemeanttat leat huksejuvvon. Lean álo leamaš mielas heivehit ráđđehusa, logai Solberg disdaga ovdalgaskabeaivvi.
Son ja bellodatjođiheaddjit Trine Skei Grande (Gurut) ja Siv Jensen (Ovddádusbellodat) deaivvadedje mediain juste ovdalaš šiehtadallamat álge.
Čatnat bargguide
Stáhtaministtar lohká ahte ođđa stáhtaráđđevirggit sáhttet čadnot reforpmaide ja erenoamáš prošeavttaide.
– Muhtun áiggiid leat áššit mat leat hui áigeguovdilat, ja dalle sáhttá gáibidit sierra stáhtaráđi gii bargá dainna. Muhtumin sáhttet mis stuora prošeavttat, mii maid mearkkaša ahte berrejit sierra olbmot geaid váldofokus lea dat prošeakta, lohká son.
Ii mielas ođđa departemeanttaide, muhto rievdadusaide
Solberg ii hilggo rievdadusaid departemeanttain ge.
– In leat nu mielas ođđa departemeanttaide. Álgoálggus lea sáhka das ahte sáhttá dohkkehit ahte stáhtaráđiin leat barggut maid sáhttá čatnat stuora reforpmaide, lohká son.
(©NTB)
