Sámediggi ja Sámi dáiddárráđđi leat soahpan dáiddáršiehtadusa jahkái 2020.
– Sámi dáidda ja sámi dáiddárat leat deaŧalaččat sámi servodaga oainnusmahttimis ja ovddideamis, ja mun lean ilus ja rámis go sámi dáidda lea čalmmustuvvon hui positiivvalaččat, sihke báikkálaččat, nationála dásis ja maiddái riikkaidgaskasaččat maŋimuš jagiid, dadjá sámediggeráđđi Henrik Olsen preassadieđáhusastis.
220 000 ruvdnosaš lasáhus
Dáiddáršiehtadusa rámma lea 8 570 000 ruvnnu, mas lea mielde 220 000 ruvdnosaš lasáhus. Ruhta leat várrejuvvon Sámi dáiddárráđi ja dan guđa dáiddárorganisašuvnna doibmii mat lea čadnon dáiddárráđđái. Lea maiddái várrejuvvon ruhta dáiddafondii ja čájáhusdivadii. Bealit leat maiddái soahpan šiehtadusas ahte vuoruhit ja bidjat eanet ruđaid dáiddárstipeanddaide.
Ođđa ovttasbargošiehtadus galgá sajis
Bealit lea dasto soahpan viidáset ovddidit ovttasbarggu, ja leat dál bargamin oažžut sadjái ođđa 4-jagáš ovttasbargošiehtadusa.
– Ovttasbargošiehtadus Sámedikki ja Sámi dáiddárráđi gaskka addá min dáiddáriidda stuorra váikkuhanfámu ovdáneapmái sámi dáiddaeallima siskkobealde, ja lea mielde láhčimin sámi dáidagii ja sámi dáiddáriidda buriid rámmaeavttuid, dadjá sámediggeráđđi Henrik Olsen.
