Muhtin oahppi roasmmehuvvai oahpahusáiggis Sámi joatkkaskuvllas ja boazodoaluskuvllas Guovdageainnus odne.
OĐASTUVVON DIIBMU 13.50:
– Jus lean ádden riekta, de lea oahppi suorbma darvánan báddešliipii gitta ja nieidda lea massán oasi olggumus suorbmaláđđasis, dadjá Oarje-Finnmárkku politiijaguovllu operašunjođiheaddji Andreas Vesterhus iFinnmark:i.
– Nieida lea šliipen eret oasi suorpmas, dadjá son.
Sáddejuvvon buohccivissui
Sámi joatkkaskuvlla ja boazodoaloskuvlla rektor Ellen Inga O. Hætta muitala oahppi sáddejuvvon buohccivissui.
– Mii eat dieđe man garrasit lea roasmmehuvvon, muhto diehtit ahte lea sáddejuvvon buohccivissui, čilge Hætta.
Ambulánsa bođii jođánit
Rektor muitala skuvlla čuvvon rutiinnaid ja njuolggadusaid, nammalassii riŋget ambulánssa ja dieđihit váhnemiidda, politiijaide ja bargobearráigehččui.
– Ambulánsa bođii erenoamáš jođánit ja dát lei hui buorre, dadjá son.
Rektor lohká iežas ovddasvástádussan čállit rapportta dáhpáhusas ja dáhkidit ahte njuolggadusat čuvvojit.
– Ja dat leat čuvvojuvvon.
Politiijat leat maid fitnan báikkis
– Mii riŋgiimet álggos báikkálaš politiijaide, muhto dáppe ii astan oktage boahtit. Nu riŋgiimet Oarje-Finnmárkku politiijaguovddážii Hammerfestii ja gáibideimmet boahtit dutkat ja govvet, čilge rektor Ellen Inga O. Hætta.
Dan lohká iežaset dahkan vai buot diekkár bealit leat čielggaduvvon.
Šliipen oasi suorpmas
– Jus lean ádden riekta, de lea oahppi suorbma darvánan báddešliipii gitta ja nieidda lea massán oasi olggumus suorbmaláđđasis, dadjá Oarje-Finnmárkku politiijaguovllu operašunjođiheaddji Andreas Vesterhus iFinnmark:i.
– Nieida lea šliipen eret oasi suorpmas, dadjá son.
Oarje-Finnmárkku politiijat dieđihedje váile 12:s eske, ahte muhtin oahppi Sámi joatkkaskuvllas ja boazodoaloskuvllas Guovdageainnus, lea bávččagahttán suorpma báddešliippain odne.
Dát galgá dáhpáhuvvan oahpahusáiggis. Politiijat fitnet báikkis dutkamin ášši.