Porsáŋggu Bargiidbellodaga sátnejođiheaddji evttohas Aina Borch lohká dehálažžan bisuhit giliskuvllaid go dat bissehit olbmuid fárremis eret gielddas ja gieldda massimis vearrotietnasa man divdna dárbbaša.
Porsáŋggu Bargiidbellodaga sátnejođiheaddji evttohas Aina Borch lohká dehálažžan bisuhit giliskuvllaid go dat bissehit olbmuid fárremis eret gielddas ja gieldda massimis vearrotietnasa man divdna dárbbaša.
– Skuvla lea dehálaš gildii. Jus mii galgat doalahit olmmošlogu gielddas ja tietnasa man sii buktet gildii, de dárbbašat mii daid giliskuvllaid. Jus skuvla jávká gilážis, de fárrejit olbmot eret gielddas ja mii dárbbašat dáid olbmuid, deattuha Bargiidbellodaga (Bb) sátnejođiheaddjeevttohas, Aina Borch.
Buorebut heivehit fálaldaga
Son ii doarjja Olgešbellodaga ja Ovddádusbellodaga mearrádusa heaittihit giliskuvllaid oppanassiige. Lohká jus leš nu mo sátnejođiheaddji Knut Roger Hansen lohká, ahte fámuhuhttit ođđa skuvlabiireortnega, ii leat nu stuorra mearkkašupmi, na dalle han sáhttet dan dahkat.
– Mii guoská Porsáŋggu gieldda ohppiide, geat vázzet Jáhkovuona skuvllas Fálesnuori gielddas go dat skuvla lea lagat go Billávuonas, de lea vejolaš ráhkadit iešguđet ohppiide sierra šiehtadusa. Muhto lea dárbu fámuhuhttit dán ovdal geasi mearriduvvon skuvlabiireortnega vai ožžot saji buorebut heivehit fálaldaga dárbbuid mielde, čilge Porsáŋggu gieldda Bb sátnejođiheaddji evttohas, Aina Borch.
Gieldda bušeahtta
Sátnejođiheaddjeevttohas Aina Borch mieđiha ahte lea váttis diehtit gos skuvllaid ruhtadeami galgá viežžat, muhto lea dárbu gieldda bušeahta geahččat ollislaččat, iige dalán gavvigoahtit ruđaid dearvvašvuođasuorggi bušeahtas.
– Mii fertet guorahallat dárkilit mo mii sáhttit bargat. Lea vejolaš lasihit oamastanvearu boahtte jagi, muhto seammás lea dehálaš lasihit gieldda bálvalusfálaldaga. Olgešbellodat ja Ovddádusbellodat geahččalit duššin dahkat Bargiidbellodaga áigumuša go sátnejođiheaddji Knut Roger Hansen čuoččuha Bb lea eahpečielggas. Mun lean sihkar mii gávdnat doarvái ruđa ruhtadit skuvllaid go doppe gávdnojit vejolašvuođat. Porsáŋggu gielda lea geahpedan olu áiggi mielde ja beaktilmahttán gieldda doaimmaid. Danin lea dárbu jurddašit ollislaččat go ráhkadat bušeahta ja danin lea dárbu ahte giliskuvllat bissot amas olbmot eai fárre eará báikkiide, joatká Aina Borch.
Son deattuha ahte skuvllat leat dehálaš servodathuksejeaddjit ja kulturguoddit, daid haga fárrejit olbmot eret báikkis. Nu jávká maid vearroruhta gielddas jus olbmot guđđet gieldda. Muhto son ii sáhte lohpidit ahte dalán go Bb beassá fápmui ahte dalle sáhttet rievdadit dálá mearrádusa go sii fertejit vuos čuovvut dálá eanetlogu dohkkehuvvon bušeahta. Lohká áramusat maŋit jagi lea vejolaš.
(Ášši lea ovdal almmuhuvvon báberaviissas, 20.08.15.)
