Ođđa dutkosis čájehuvvo ahte nuoramus bártnážat dolket jođánit skuvlii. Skuvladutki oaivvilda sivvan leat go skuvla ii leat heivehuvvon juste dán jovkui.
Skuvladutki lea jearran ohppiin vuosttaš luohkkáhasaid njealját luohkkáhasaide loktet go skuvllas. Birrasii 10 proseantta vástidit ahte sii eai loavtte eai veháge eai ge hálit leat skuvllas. 70 proseantta sis leat bártnážat.
– Dát čájeha ahte skuvla lea erenoamáš hástalus lunttažiidda geat dán agis álget skuvlii, muitala Nordahl NRK:i. Iskkadeapmi lea čađahuvvon Hedemárkkus, muhto dutkit oaivvildit loguid sáhttit heivet olles riikii.
Stuora erohusat
Ii gávdno konkrehta dutkan manne juste bártnážiin unnu mokta skuvllas, muhto Nordahl jáhkká son diehtá manne nu lea.
– Skuvlabeaivvit leat guhkkon, ja leat eanet skuvlabarggut go šaddá jaska čohkkát. Dat sáhttá dagahit ahte muhtin lunttat, geain lea dárbu lihkadit, šaddet hui mášoheapmin eai ge nagot sajáiduvvat, lohká son.
Son jáhkká maid ahte oahpaheaddjit eai ipmir doarvái bures man stuora erohus lea 6- ja 7-jahkásaččain sihke máhtus ja čehppodagas.
Guorahallet dili
Oahppoministtar Torbjørn Røe Isaksen (Olgeš) lea ovttaoaivilis Nordahla vuorjašumiide. Dan dihte lea ráđđehus ásahan áššedovdijoavkku mii galgá guorahallat manne bártnážat eai loavtte skuvllas.
(©NTB)
