Gaskavahku eahkedis geavai skuterlihkohisvuohta Guhttasis olggobealde Gárasavvona, Ruoŧa bealde. 20-jahkásaš skutervuoddji roasmmehuvai.
Guokte skutervuoddji leaigga meahcis vuodjime go lihkohisvuohta geavai. Lei nubbi sudnos gii válddii oktavuođa SOS gádjunvehkiin. Vuosttaš diehtu bođii 18.54 eahkedis. Gádjunveahka sáddejuvvui lihkohisvuođabáikái mii lei meahcis, máŋga kilomehtera lagamus biilaluottas.
Politiijagulahalli Liv Fahlén muitala ahte 20-jahkásaš skutervuoddji lea eret Girona guovllus. Son lea vuodján geađgái ja lea roasmmehuvvan.
– Sii šadde máŋga kilomehtera fievrridit roasmmehuvvan olbmo lagamus biilaluddii. Ambulánsahelikopter doalvvui olbmá Jiellevári buohccevissui eahkedis. Gádjunakšuvdna heaittihuvvui 21 áigge.
Politiijagulahalli Liv Fahlén čilge ahte politiijat leat iskagoahtán lihkohisvuođa.
– Min leat dál guorahallame dan ášši ja justa dál eai gávdno eambbo dieđut skuterlihkohisvuođa birram lohká son.
Jiellevári buohcciviesus
Regiovdna Norrbottena gulahallanhoavda Tony Järlström dieđiha ahte 20-jahkásaš skutervuoddji ii roasmmehuvvan bahuid lihkohisvuođas, muhto son lea ain divššus Jiellevári buohcciviesus.
