Silisjávrri guovllus leat njealji bartas leamaš sisagaikumat mannan vahkus.
Silisjávrri guovllus leat njealji bartas leamaš sisagaikumat mannan vahkus.
Silisjávrri guovllus, Guovdageainnu suohkanis leat leamaš rievvárat jođus ja gaikon sisa máŋgga bartii.
Oarje Finnmárkku politiijaguovllu operašuvdnajođiheaddji Andreas Vesterhus muitala politiijat ožžo dieđu sisagaikuma birra mannan lávvordaga, muhto leat easka otne leamaš iskame Silisjávrris.
– Lei okta bartaeaiggát gii dieđihii su bartas lea leamaš sisagaikun, muhto mis ii lean vejolaš lávvordaga fitnat báikkis. Danne ávžžuheimmet ahte ieš ii fina bartas, vai eat manat luottaid maid rievvárat leat guođđán, muitala Vesterhus.
Dáhttot bartaeaiggádiid iskat
Otne leatge politiijat fitnan iskame barta ja gávnnahedje ahte ledje oktiibuot njeallje barta gos ledje leamaš sisagaikumat.
– Mii eat leat ožžon vuos eará ovtta váidaga, ja eatge dieđe vel leat sisagaikumiin suoláduvvon mihkkege. Danne dáhttut ge bartaeaiggádiid guovllus fitnat iskame leat go sin barttain leamaš sisagaikun, lohká Vesterhus.
Politiijat čuovvolit ášši, vuordimis Guovdageainnu leansmánne kantuvrra bokte.
