Ođđajagemánu gaskamutto rájes leamaš ovcci sisagaikuma Romssa gávpogis, dál ávžžuhit politiijat ávžžuhit olbmuid váldit oktavuođa jus vásihit eahpedábálaš dáhpáhusaid iežaset orrunguovllus.
Maŋimuš mánu leat Romssa gávpogis leamaš ovcci sisagaikuma, ja politiijat dadjet ahte leat sullasašvuođat dáhpáhusain.
– Sisagaikumat leat dáhpáhuvvan seamma guovllus, namalassii gasku Romssa sullo. Buot sisagaikumat leat deaividan beaivet ja suola dahje suollagat cuvkejit olgouvssaláse dahje eará láse vai besset sisa, čilge Romssa politiijaguovllu dábálašdutkama jođiheaddji Jarle Johnsen Nordlys aviisii.
Ávžžuhus
Maŋimuš jagiid leamaš unnán sisagaikumat Romssas, ja go ovcci sisagaikuma dáhpáhuvvet oanehis bottas, de bidjet politiijat liige návccaid čoavdin dihtii vearredaguid.
– Dál rávvet olbmuid čuovvut mielde leat go makkár ge eahpedábálaš dáhpáhusat sin orrunguovllus, ja jus gearjideaddjit riŋgejit uksii, de berrejit olbmot dieđihit dáhpáhusa politiijaide, ávžžuha Johnsen.
