Guovdageainnu Johttisápmelaččaid sátnejođiheaddjeevttohas lohká váttisin válljet deháleamos válgaášši, muhto suohkanekonomiija lohká leat dehálažžan dál. Ja jus dat galggaš njuolgat, de oaivvilda fertet lonuhit politihkalaš stivrejumi Guovdageainnus.
Guovdageainnu Johttisápmelaččaid sátnejođiheaddjeevttohas lohká váttisin válljet deháleamos válgaášši, muhto suohkanekonomiija lohká leat dehálažžan dál. Ja jus dat galggaš njuolgat, de oaivvilda fertet lonuhit politihkalaš stivrejumi Guovdageainnus.
Johttisápmelaččaid listtu sátnejođiheaddjeevttohas Anders S. Buljo, Guovdageainnu suohkanválggaide, lea vástidan Ávvira gažaldagaide mas mii jearrat golbma gažaldaga juohke bellodaga njunnošis.
Vuosttaš gažaldahkii, mas jearrat maid son atná deháleamos válgaáššin Guovdageainnus, lohká leat veaháš váttisin vástidit:
– Dehálaš ášši dál lea mu mielas dat ahte buoridit suohkana ekonomiija ja beassat dán heitot ruhtadilis mas min suohkan otne lea, vai mii oažžut fas vejolašvuođa ovdánahttit suohkana ja addit daid buoremus fálaldagaid álbmogii. Mu mielas lea ealáhusovdáneapmi dehálaš ášši danne go mii dárbbašit ođđa bargosajiid ja dat lea juoga mii maid laktasa suohkanekonomiijai.
– Stivren 1999 rájes
Buljo jáhkká ahte jus galget rievdadeamit dáhpáhuvvat Guovdageainnus de ferte politihkalaš stivrejupmi rievdat.
– Sii geat dal leat stivren suohkana politihkalaččat, leat stivrren 1999 rájes ja dál livččii áigi rievdadit stivrejumi. Dat lea dál jienasteddjiid duohken dan mearridit galgá go rievdat. Dat ii leat buorre boađus jienasteddjiid mielas, nu movt mun gulan olbmuin, go suohkanis lea nie stuora vuolláibáza ja danne fertešii eará stivrejupmi suohkanpolitihkas.
Son oaivvilda buorre ovdamearkan dasa mo ii galgga hálddašit suohkana ekonomiija, leat go suohkanstivrra eanetlohku mearridii váldit loana ja ruhtadii Náránaš luotta ja šalddi.
– Das eai boahtán dat 50-60 bargosaji ja sisaboahtu mii lei lohpiduvvon, muhto loana goitge gal suohkan šaddá máksit.
– Mu oaidnu ealáhusovdáneami ektui lea nu ahte mis dáppe Guovdageainnu suohkanis leat stuora vejolašvuođat ovdánahttit turistta- ja mátkkoštanealáhusa. Mii sáhtášeimmet dáppe fállat dakkár mátkkoštanbuktagiid mas vuođđu lea min kultuvra ja eallinvuohki ja dat leage min ovdamunni. Mis ii leat otne báljo birrajagi fálaldat turisttaide ja dakko mun oainnán ovdánanvejolašvuođaid.
Buljo oaivvilda ealáhusovdáneapmin leat maid ahte nannet rámmaeavttuid vuođđoealáhusaide, nugo boazodollui,eanandollui ja meahcástanealáhussii, vai dain ealáhusain leat ovdánanvejolašvuođat.
Mánát, nuorat ja vuorrasat olbmot váibmoáššin
Goalmmát gažaldagas leat jearran mat Buljo váibmoáššit leat, dasa vástida ná:
– Mánáid ja nuoraid bajásšaddan dilli ja boahtteáigi. Ahte mánáin ja nuorain lea oadjebas ja buorre bajásšaddan dilli. Dás lea sáhka skuvlavisti ja sisdoallu birra. Astoáiggefálaldagat valáštallamis ja kultuvrras.
Muhto ii leat dušše nuoramusaid dilli Buljo váibmoáššin:
– Boarrásiid ja doaimmashehttejuvvon olbmuid dilli. Min boarrásiid lohku lassána ja lea dárbu hutkat dan dili ektui. Lea dárbu hutkat eambbo dikšosajiid sidjiide. Doaimmashehttejuvvon olbmot lea okta joavku min servodagas mas ii leat nu alla jietna ja de leage hui dehálaš gullat makkár dárbbut sis leat vai mii máhttit láhčit sidjiide buori ja oadjebas dili.
