Romssa politiijaguovlu sihtet olbmuid váruhit jus mátkkálaš olgoriikkalaččat fállet bargat olbmuid ovddas.
Maŋemus jagiid leat politiijat oaidnán lassáneami Romssa guovllus gos olgoriikkalaš mátkkálaččat fállet bordit geđggiid ja geaid maid gohčodit «Travellers». Dán jagi lohket politiijat maid vuordit mátkkálaččaid boahtit Romssa guvlui ja Davvi-Norgii ja fállat iežaset bálvalusaid.
Bealledagut barggut
Sihke politiijat ja Vearroetáhtta Romssas leat gullan olbmuin ahte mátkkálaččat leat bealledagut ja heajos barggu bargan. Politiijat muitalit maid ahte lea vásihuvvon ahte sii eai dušše bordde geđggiid, muhto maŋemus áiggiid leat álgán fállat asfalteret ja bassat dáhkiid ja eará olgobargguid bargat.
Ovttasbarget gávdnat láhkarihkkumiid
Diibmá álggahii politiija, Vearroetáhta, Duolloetáhta, Bargobearráigeahčču ja Stáda geaidnodoaimmahat ovttasbarggu hehttet dákkár bargoláhkarihkkuma. Ovttasbarggu bokte leat álgán eanet iskat vai gávdnet bargodilálašvuođa mii rihkku lága.
Dán jagi joatká ovttasbargu vai bargit geat rihkkot lágaid gávnnahallet. Sii geat barget lágaid mielde ožžot dieđusge joatkit.
Politiijat háliidit ahte olbmot cavgilit jus bohtet geađgebordit fállat iežas bálvalusaid geat eai oro čuovvume lágaid, dahje jus olbmot oidnet ahte dákkár barggut leat jođus iežaset lagasbirrasis. Politiijaid váldonummár lea 02800 gosa sihtet cavgilemiid.
Mátkkálaš bargiid dovdomearkkat leat:
– Sii bohtet olbmuid viesuide ja fállet bálvalusaid.
– Sii lohket alddis fitnodaga mas lea organisašuvdnanummár
– Sihtet reaidaruđa máksot gihtii
– Háliidit ovdalgihtii máksot bálkká
– Vulget measta lihkka jođánit go bohtet
