Amerihká supernásti Cynthia Nixon, gii lea dovddus «Sex and the City» ráiddus, lei náitalanmátkkis ja galledii Ruonáeatnama, Islándda ja Norgga. Norggas finaiga soai eamidiinnis Polarmuseas Romssas.
Polarmuseas lea čájáhus man namma lea «Polarhistorie på skeiva», ja čájáhus lea Norgga árktalaš universitehta/Polarmusea buktu Bonju kulturjahkái 2022, mii čalmmustahttá ahte lea 50 jagi áigi dan rájes go homoseksuála olbmot Norggas eai šat kriminaliserejuvvon. Čájáhus bistá guokte jagi.
Cynthia Nixon Instagram-siiddus leat dál čoggojuvvon govat su mátkkis, main okta govva čájeha su ovttas Gjert Rognli dáidagiin «Homocruising» mii heaŋgá Polarmusea seainnis. Dáidda lea inspirerejuvvon alit šilttain mat oanehaččat muitalit kulturhistorjjá.
– Lei hui somá oaidnit ahte Cynthia Nixon govvii iežas ovttas mu dáidagiin man čájehan Polarmuseas Romssas. Son han lea bonju seamma láhkai go mun, nu ahte dat gal lea erenoamáš somás vásáhus, dadjá Gjert Rognli.
