Kárášjoga ráđđealmmái lea fuolas ja evttoha earret eará heaittihit virggiid gokčan dihtii gieldda stuorra eanetgeavaheami.
Kárášjoga gielda rahčá ekonomalaččat, ja ráđđealmmái Kurt Maurstad lea fuolas ja čállá ovdagoddái iežas árvvoštallat ahte vaikko eanetgeavaheapmi ii leat nu stuoris go 13 miljovnna ruvnno, de lea gieldda eanetgeavaheapmi menddo stuoris.
Logut čájehit ahte gielddas lea birrasii 6 miljovnna eanetgeavaheapmi ja ráđđealmmái lea evttohan doaimmaid mat galget gokčat gieldda eanetgeavaheami.
Dá leat ráđđealbmá doaibmaárvalusat:
1. Árvvoštallat heaittihit virggiid.
2. Dušše hui dárbbašlaš oastimat galget čađahuvvot ossodagain dás rájes.
3. Dearvvašvuođa ja fuolahusbálvalusas ferte ráhkaduvvot plána ja doaibma olggosgoludárkkisteamis.
4. Bargagoahtit unnidit buozalmasvuođa ja goluid mat leat čadnon buozalmasjávkamii.
5. Joatkit fokusiin rekrutteret fágagelbbolašvuođa buot rabas virggiin.
6. Geavahit sadjásaš bargiid galgá minimumas.
7. Goluid doaibmabušeahtas galgá váldit investerenbušeahtas.
Eanetgeavaheapmi unnon mánus
Kárášjoga ovdagottis lea čoahkkin duorastaga gos galget meannudit borgemánu raportta mii guoská gieldda ekonomiijai ja buozalmasvuhtii.
Logut čájehit ahte eanetgeavaheapmi lea unnon sullii 600 000 ruvnnuin suoidnemánus borgemánnui, muhto dattetge leat sevdnjes logut Kárášjoga gieldda rehketdoalus, mii fuolasta ráđđealbmá Kurt Maurstad boahtá ovdan áššebáhpáriin.
