Gáregasnjárgga gávpejas, Seppo Härkönen, lea vuovdán iežas borramušbuvdda, K Market Härkönen Karigasniemi, ohcejohkalažžii Hans-Niiles Tapiolai.
Gávpejas Seppo Härkönen válddii badjelasas su váhnemiid buvdda Roavvesavvonis lagabui 50 jagi dás ovdalis ja sirddii buvdda Gáregasnjárgii. Dat mearkkaša ahte Härkönen bearrašis lea leamaš borramušgávpi badjelaš 70 jagi dán guovllus.
Eanaš kundarat bohtet miehtá Finnmárkku. Koronapandemiija áiggi go riikarádjá giddejuvvui, de doalai son gávppi rabasin báikeolbmuide.
Son lea dál deavdán 68 jagi ja muitala Ávvirii ahte son háliida geahpedit iežas barggu veaháš. Son lea maid muitalan ahte son ii háliit joavdelastit, iige háliit guođđit gávpedoalu oalát ja danin son jođihišgoahtá fas iežas huksengávppi Tenohalli Gáregasnjárggas.
Sagat.no aviisii muitala son ahte su maŋimuš beaivi borramušbuvddas, lea lávvardaga, skábmamánu 25.beaivvi. Das maŋŋá jođihišgoahtá Hans-Niiles Tapiola borramušgávpi, muitala Yle Sápmi.
