Vihtta sámi dáiddára servet riikkaidgaskasaš dáiddačájáhussii «Documenta 14» Kasselis Duiskaeatnamis, sámedikke presideanta searvá čájáhussii.
– Čájáhus addá áidnalunddot vejolašvuođa gaskkustit sámi dáidaga riikkaidgaskasaččat, dadjá Sámedikki presideanta Vibeke Larsen preassadieđáhusastis, gii searvá čájáhussii geassemánus.
Historjjálaš dáhpáhus
Čájáhus Documenta lágiduvvo juohke viđat jagi, ja 2017:s lágiduvvo dat duiskalaš gávpoga Kassela ja greikkalaš oaivegávpoga Atena gaskka. Oktage sámi dáiddár ii leat ovdal čájehan bargguidis dán riikkaidgaskasaš čájáhusas.
– Dát lea stuorra ja historjjálaš dáhpáhus, dadjá Vibeke Larsen.
Bistá 100 beaivvi
Documenta adnojuvvo leat okta deaŧaleamos ođđaáiggi dáiddadáhpáhusain, ja čájáhussii čájehit hui stuorra beroštumi sihke preassa, ámmátlaš bargit dáiddamáilmmis. Čájáhus mii bistá 100 beaivvi lágiduvvui maŋimuš 2012:s, ja dan gallededje dalle badjel 850.000 guossi. Lohku 14 čájeha ahte dat lágiduvvo 14. gearddi.
Dát servvet:
Dáiddáriid gaskkas geat servet Kasselis ja Atenas leat Hans Ragnar Mathisen, Britta Marakatt-Labba, Synnøve Persen, Joar Nango ja Máret Ánne Sara. Dasa lassin leat maiddái Iver Jåks ja John Savio dáidagat mielde dán čájáhusas.
Sámedikki presideanta Vibeke Larsen lea Kasselis geassemánu 8. beaivvi rájes geassemánu 11. beaivvi rádjai.
