Stáda Geaidnodoaimmahat bivdá buori áiggis vuolgit ja siivvožit vuodjit luoddabargguid meaddel.
Stáda Geaidnodoaimmahat bivdá buori áiggis vuolgit ja siivvožit vuodjit luoddabargguid meaddel.
Finnmárkkus eai leat goassege leamaš nu olu geaidnobarggut go dál, sihke ođđa huksemat ja divodeamit.
– Leat ilus go buorránit geainnut, muhto dat buktá hehttehusaid johtolahkii huksedettiin, dadjá ossodatdirektevra Oddbjørg Mikkelsen Stáda Geaidnodoaimmahagas Finnmárkkus sierra preassadieđáhusas.
Vuordit diimmu
Riikkageainnus 94 Skáiddi davábealde ja E6:s Álttá ja Romssa fylkkaráji gaskkas lea geaidnu gitta gaskkohagaid. Álttá oarjjabealde sáhttá guovtti sajis leat vuordináigi 10-15 minuvtta, ja bávkalemiid geažil gitta diimmu vuordináigi. Dás sáhttá diŋgot SMS-dieđuid. Leahttorádji lea 30 ja 50 km/t gokko leat luoddabarggut.
Olles fylkkas bissehit johtolaga čuovggaiguin gokko ain leat bidjame ođđa asfáltta, nugo E6 Riehponávžžis dahket. Suoidneleavšši ja Skáiddi gaskka giddejit maid geainnu gaskkohagaid uđassihkkarastinbarggu geažil.
Vuordit guokte diimmu
Čuollovuonas fylkkageainnus 98 Deanus sáhttet gitta guovtti diibmui giddet luotta bávkalemiid geažil lagamus vahkuid.
– Ii leat dieđusge áibbas buorre go leat nu olu luoddabarggut juste geasi áiggi go olbmuin lea luopmu, muhto go geassi ii bistte guhká ja lea olu bargu, de jáhkán olbmot ipmirdit dan, dadjá son ja bivdá buohkaid vuolgit buori áiggis ja vuodjit várrogasat luoddabargguid meaddel.
Iskka 175!
Davvi-Norgga geaidnojohtolatguovddážis ges ávžžuhit iskat johtolatdieđuid 175.no:s ovdal go vuolggát mátkái.
