Kárášjoga gieldda sátnejođiheaddji Svein Atle Somby oččohalai váibmui mannan lávvardaga ja sáddejuvvui Tromssa Universitehta buohccivissui.
Kárášjoga gieldda sátnejođiheaddji Svein Atle Somby oččohalai váibmui mannan lávvardaga ja sáddejuvvui Tromssa Universitehta buohccivissui.
Sátnejođiheaddji Svein Atle Somby muitala iežas oččohallan váibmui mannan lávvardaga ja sáddejuvvon Tromsii buohccivissui.
– Mun fáhkka buohccájin ja sáddejuvvojin, muhto dál lean stabiila ja manná bures mus, muitala Svein Atle Somby Ávvirii Tromssa buohcciviesus.
Son ii goittot loga váttu boahtán dál, muhto lea boahtán veahážiid mielde áiggi badjel.
Ii vikka duššindahkat
Svein Atle Somby dovddasta váibmosiva leamaš kritihkalažžan, earet eará guhkes gaskkaid geažil buohcciviesuide.
Son lohká juohke minuhtta dehálažžan.
– Mii diehttit gal gos mii orrut ja mis leat buorit dearvvašvuođa suorggi bargit ja sáddejupmi manai hui jođánit. Dat lea dieđus kritihkalaš go buohcá Kárášjogas, inge sáhtte duššindahkat daid guhkes gaskkaid ja lea duođalaš go buohcciviesut leat nu guhkkin, dovddasta son.
Ain buohcciviesus
Son lea ain Tromssa Universitehta buohcciviesus, iige leat sihkar goas čálihuvvo olggos.
– Mun galgen gal odne beassat ruoktot, muhto in beassan vuos, dadjá son.
Doaibmá sadjásažžan
Ráđđealmmái Elfrid Boine maiddái duođaštii sátnejođiheaddji sáddejuvvon buohccivissui, muhto deattuhii ahte suinna manná bures.
– Sátnejođiheaddji sadjásažžan doaibmá várresátnejođiheaddji John Nystad, dassá go sátnejođiheaddji dearvvašmuvvá. Mii almmuhat maiddái dán birra iežamet ruovttusiiddus otná beaivvi mielde, muitala Boine Ávvirii.
