Suorggit areála, vuoigatvuođat, kulturmuittut, guolástus, boazodoallu, eanandoallu ja meahccegeavaheapmi gullet vuđolaččat oktii sámiid vuoigatvuođaid dáfus.
– Bargiidbellodaga sámediggejoavku oaidná dárbbašlažžan ovttastahttit resursageavaheami sámi vuoigatvuođaid čuovvoleamis, ja areála- ja resursageavaheamis. Mii evttohit ahte Sámediggi 2018 bušeahtas várre 3,2 miljovnna dan bargui, dadjá sámediggeáirras Ronny Wilhelmsen preassadieđáhusastis.
Wilhelmsen čállá ahte sámi beroštumiin ja vuoigatvuođalaččain galgá duohta vejolašvuohta konsulterejuvvot vai sáhttet addit friddja ovdagihtii dieđihuvvon mieđiheami plánaide ja doaibmabijuide mat gullet areála- ja resursahálddašeapmái.
Eambbo suorggit fertejit fuolahit vuoigatvuođaid
Bargiidbellodaga sámediggejoavku oaivvilda ahte ruđat sáhttet adnot prošeavttaide ja doaibmabijuide main ulbmil lea addit veahki sámi vuoigatvuođalaččaide áššiin maid ferte fievrredit duopmostuoluide.
Dát guoská prinsihpalaš lunddot áššiide mat gullet nannán/mearra- ja resursavuoigatvuođaid fuolaheapmái.
Dasa lassin sáhttet ruđat adnot prošeavttaide ja doaibmabijuide main ulbmil lea kártet sámi dološvieruid geavaheami hálddašeamis dahje dieđuid juohkit ahte hálddašeapmi galgá deattuhit sámi dološvieruid.
Dasa lassin háliidit guokte virggi mearrasámi ulbmiliidda ja boazodoalloulbmiliidda.
– Sámediggi ferte eambbo bargat dainna ahte eanet surggiin fuolahit sámi vuoigatvuođaid, ja resursageavaheapmi ferte ovttastahttojuvvot. Lea hoahppu čielggadit buot ealáhusaid dálá vuoigatvuođaid, loahpaha Ronny Wilhelmsen.
