Offroad Finnmark 300 kilomehter -gilvu lea bures boahtán johtui.
Duorastaga maŋŋelgaskabeaivvi lei vuolgga Offroad Finnmark 300 kilomehter -gilvvus. Ija mielde leat gilvaleaddjit sihkkelastan sihke Tutteberget ja Bojobeaskibartta meattá. Muhtumat leat ollen vel Šuoššjávrri meatta maid ja leat jorggihan fas Álttá guvlui.
Guovdageainnu joavku, Länsman Racing, mas Niillas Joavnna Länsmann ja Johan Anders Bongo leaba, registrerejuvvuiga váile diibmu 08:00 bearjadaga iđđes mannan Bojobeaskibartta meattá. Váile diibmu 10:30 leaba soai duolmmadeame Likčačearu badjel, 27. sajis gilvvus.
Nubbe joavku, Máze Ruovddit, mas Kent Ailo Hætta ja Per Egil Eira leaba, sudno lea GPS bisánan Stuoroaivvi buohta. Dat sáhttá mearkkašit ovdamearkka dihte ahte sudno GPS lea jáddan, muhto ahte leaba ain sihkkelastime ja nu ii GPS registrere gos soai leaba.
Maŋŋalaga
Team Sara joavkkus leaba Geir Jøran Sara ja Tom-Viggo Vårdal. Sudno GPS čájeha ahte soai leaba Likčačearu vulos duolbmame, Heastabuolžža guvlui. Soai leaba bearjadaga iđđesbeaivvi 21. sajis gilvvus.
Maiddái Team Heavy-Duty, mas Tom-Rune Johnskareng, Mads Sandvik ja Espen Knutsen leat duolbmume Heastabuolžža guvlui, 23. sajis gilvvus.
Joavku mii lea njunnošis lea Team CPS, mas Bjørn-Vidar Suhr ja Tobias Farstad. Joavku lea olleme Joatka registrerenbáikái.
