Mikkel Eskil Mikkelsen lea hui movtta go bargu álggahit sámi buohccedivššároahpu dál orru buktimin bohtosiid.
Sámediggeráđđi Mikkel Eskil Mikkelsen illuda go ráđđehusbellodagat ja Risttalaš Álbmotbellodat leat soahpan buohccedivššároahpu sihkkarastima sámegillii, ja go lea juolludan ruđa 25 oahpposadjái.
– Dat lea hui buorre sámi servodahkii, dadjá Mikkel Eskil Mikkelsen preassadieđáhusastis.
Lassi ruhta oahpu láhčimii
Sámi buohccedivššároahppu lea UiT Norgga árktalaš universitehta ja Sámi allaskuvlla ovttasbargu.
Lassin oahpposajiide, áigot ráđđehusbellodagat ja Risttalaš Álbmotbellodat addit ruđa Sámi allaskuvlii oahpu láhčimii.
Oktiibuot lea dát birrasii 2 miljon ruvnno 2019:s.
Mikkel Eskil Mikkelsen rámida Sámi allaskuvlla ja UiT Norgga árktalaš universitehta go ovttasbarget sámi buohccedivššároahpu vuoruhemiin.
– Dát čájeha geavahusas ahte sii váldet servodatovddasvástádusa sámi servodaga ektui duođalaččat, dadjá Mikkelsen.
